Avannaa

Partiimut allamut nuuttoq avannaani sunniuteqarusuppoq

Inuit Ataqatigiit Qaasuitsup Kommuniani ilaasortaatitaat, Jens Vetterlain, Siumumut nuuppoq. Illuatungiulittut IA-kkut taamaalillutik kommunalbestyrelsimi sisamanaannarnik ilaasortaatitaqalerput

Qaasuitsup Kommuniani kommunalbestyrelsimi ilaasortaq, Jens Vetterlain, ataasinngornermi nalunaaruteqarpoq Inuit Ataqatigiit partiianniit Siumup partiianut nuulluni.

Ppineqartup nammineerluni oqaluttuarnera naapertorlugu nuunnera kommunalbestyrelsimi sulinermini sunniuteqarnerusunneranik tunngaveqarpoq.

- Qaasuitsup Kommuniani kommunalbestyrelsimi ilaasortaavunga, kisianni taamaallaat Kikkut tamat Oqartussaaqataanerat, Kommune, Attaveqaqatigiinneq Attaveqaatinullu ataatsimiititaliami ilaasortaallunga, taamaalillunga sunniuteqarpallaarnanga. Taamaammat Siumumut nuuppunga, sunniuteqarnerunissara siunertaralugu, Jens Vetterlain Sermitsiaq.AG-mut oqarpoq.

Jens Vetterlainip aamma oqaluttuaraa arlalippassuartigut Inuit Ataqatigiit nuna tamakkerlugu uranimut politikkianut isumaqataasarsimannginnini nuunnerminut patsisaaqataasoq.

Jens Vetterlainip Siumumut nuunneratigut, Siumut kommunalbestyrelsimi ullumikkut 14-inik ilaasortaatitaqalerpoq, partii suleqatigisaa Atassut pingasunik ilaasortaatitaqartoq.

Atuaruk: Partiimit anisoqareernerata kingorna IA Qeqqata Kommuniani ataasiinnarmik ilaasortaatitaqalersoq

Powered by Labrador CMS