nuuttoq
Partiimit anisoqareernerata kingorna IA Qeqqata Kommuniani ataasiinnarmik ilaasortaatitaqalersoq
Malene Ingemannip Partii Naleqqamut nooreernerata kingorna Qeqqata Kommuniani IA sinnerlugu Agathe Fontain kisimi ilaasortaalerpoq
Inuit Ataqatigiinnit Malene Ingemann Partii Naleqqamut nuunnini nalunaarutigereeraa Qeqqata Kommuniani borgmesteri Hermann Berthelsen, Siumut, kommunimi borgmesteriunera apeqquserneqarsinnaanngitsumik inissisimalerpoq.
Kommunalbestyrelsimi Inuit Ataqatigiit sinnerlugit Agathe Fontain kisimi ilaasortaalerpoq.
- Nunatsinni ataatsimut kivitseqatigiilluta ingerlalerutta assigiimmillu atugaqalerutta Nuuk aatsaat pitsaasumik inissisimalissasoq isumaqarpunga. Oqaatsit pitsaasut atussallugit amigarpoq. Inuiaqatigiinni allannguisoqassappat iliuuseqartoqartariaqarpoq. Partii Naleraq tassunga eqqarsartaasaa uannut tulluarneruvoq, Malene Ingemann tusagassiutinut nalunaarummi allappoq.
Pitsanngorsaasoqartariaqartoq
- Kalaallit Nunaata aqunneqarnerata oqilisarneqarnissaa pitsanngorsarneqarnissaalu anguniagaraara. Inuiaqatigiinnut 56.000-inut tamanut iluaqutaasumik sulisoqartariaqalerpoq. Innuttaasut ataatsimoortuusutut isigineqartariaqarput. Innuttaasut tamarmik iluaqutissaanik aalajangiisoqartariaqalerpoq, Malene Ingemann Sisimiuni takornarialerinermik suliaqartoq oqarpoq.
Nunatta aningaasaqarnera pillugu Partii Naleqqami immersueqataasinnaalluni oqarpoq.
- Nunatsinni atukkanik pitsanngorsaasoqarnissaa anguniagaraara. Inuussutissarsiornermi piorsaaniartut sullinneqarnissaat aamma takornarialerinermi ineriartortitsisoqarnissaa anguniarpara, kiisalu naleqartitat allat aamma suleqatigiiffigineqarnissaat anguniagaraara. Innuttaasut ineriartornissaat anguniarlugu politikkereqalertariaqarpoq aningaasaqarnikkut ineriartortitserusuttunik. Suliniutit angisuut utaqqineqassanngillat, nammineerluta ineriartornissatsinnut sulisariaqarpugut, Malene Ingemann oqarpoq.