Partii tapertaasoq aningaasanut inatsimmi annertuumik allannguisoqarnissaanik piumasaqarpoq
Naalakkersuisoqatigiit siunnersuutaat angusaqarluarnianngitsutut Demokraatit nalilerpaat. Aaqqissuusseqqinnissanut tunngatillugu Naalakkersuisunut nukingisaarivoq.
Kim Kielsenip (S) Demokraatit tapersiineratigut, partiimik oqitsumik tapersersorneqarnissamik naatsorsuuteqarsimaguni, aningaasanut inatsimmik maanna oqallisigineqartumi paasisaqarsimassaaq.
Tassami Demokraatit siulittaasuata Niels Thomsenip oqaaseqaammini tunuarsimaanngilaq. Ullumikkut siullermeerinninnerup kingorna, Inatsisartut suli siunnersuummik allannguinissamut periarfissaqartut, taassuma oqaatigaa.
- Aammami qujanaannarpoq siunnersuummi ullumikkut saqqummiunneqartoq pitsaanngilaq. Taamaammallu piffissami aggersumi suliassaqarpugut, Niels Thomsen (D) naqissusiivoq.
Ingerlalluarnermi ileqqaarneq
Taanna ukiuni kingullerni aningaasarsiornerup ingerlalluarnera unnersuutigaa, ukiullu ingerlalluarfiusut ukiunut ajornernut ileqqaarfittut atorneqarnissaat oqaatigaa. Tassanilu siunnersuut sinneqartooruteqalaaginnartoq naammaginanngilluinnartoq, taanna isumaqarpoq.
- Tamanna tunngavigalugu Demokraatini Naalakkersuisut aningaasanut inatsisissatut siunnersuutaa angusaqarluarnissamut tunngavissiinngitsutut isigaarput aamma politikkikkut namminiilivikkusunnitsinnut tulluanngilaq, angusariaqaratsigumi aningaasarsiornikkut imminut pilersorsinnaanissaq.
Aaqqissuusseqqinnerit kinguartinnerat ilaaffiginianngikkaat
Partii siullermik aaqqissuusseqqinnernik, nunap aningaasaqarneranik patajaallisitsisinnaasumik aamma imminut pilersorsinnaasumik piumasaqarpoq.
- Uagutsinnulli paatsuunganalaarpoq Naalakkersuisut arlaleriarlutik oqarmata paasinarsarlugulu ukioq 2019 atorumaarlugu ukiutut ikaarsaarfittut, tamatumalu kingorna 2020 aallarnerfigalugu ukiuni tulliuttuni iluarsartuussinerit assigiinngitsut aallartinniarlugit. Tamanna uangut isumarput naapertorlugu arriippallaaqaaq.
- Taamaattumik Naalakkersuisut kaammattorusuppagut akisussaanertik takuteqqullugu sukkanerusumillu suliaq ingerlateqqullugu. Inuiaqatigiit akissaqartinngilaat naalakkersuisooqatigiit atuutilersut aamma iluarsartuussinissanik ukiumik ataatsimik kinguartitseqqinnissaat, misilittakkammi ersarilluinnartumik takutereerpaat ukioq ataasinnguaq atorneqartartoq sunngilluinnarnissamut.
- Suleriuseq taamaattoq Demokraatini akuerisinnaanngilarput peqataaffigerusunnagulu, partii Naalakkersuisut ingerlanissaminnut pisariaqartitaat taama oqariartuuteqarpoq.