Partii Naleraq

Partii: Nunanit allaneersut nunatsinnut suliartortut annikillineqanngikkunik unitsinneqarlik

Partii Naleqqap qanoq nunarput saatinniarnerlugu KNR-imi 'Oqalliffimmi' isummatik itisilerlugit nassuiaapput

Neriniartarfik Charoen Porn Nuummiittoq thailanimiunik sulisoqarnini nalunnginneqaatigaa. Assi toqqorsivimmit

Sermitsiaq.AG-mi allaaserineqareerpoq Partii Naleqqap anguniagai, tassani nunaqarfiit isorliunerusullu sammineqarput, taakkunani naligiinnginneq akiorniarlugu sulissuteqarniarlutik nalunaarutigalugu.

- Isorliunerusuni najugallit immikkut aaqqissuussiffigineqarnissaat saneqqunneqarsinnaajunnaarpoq, sanaartornikkut unittooqqaneq inissialiornerillu naapertuunnerusut aallartinneqarnissat Partii Naleqqap anguniassallugu ilungersuutissavaa, pingaartumik Avanersuarmi, Tunumilu, pissutsit aamma inuit atugaannut tunngasut, ulluinnarnilu ineqarnikkut inuussutissallu akiinik akilertagaat eqqarsaatigalugit, partiimi siulittaasoq Hans Enoksen nassuiaateqareerpoq.

Kalaallit Nunaat sumut saatinniarneqassanersoq KNR-imi 'Oqalliffimmi' partiip siulittaasuata apersorneqarnermini partiip anguniagai itisilerlugit nassuiarpai.

- Allaffissorneq, maanna marloqiusamik ingerlanneqartoq, nunatsinnut naleqqussarneqartariaqartoq, Hans Enoksen oqarpoq.

- Akikillisaasoqartariaqarpoq, tapiissutit annertuut akissaqarfiginngilagut, taamaattumik allaffissorneq inunnut 56.000-nut naleqqussarneqartariaqarpoq, imaanngilaq inuit 5 millionit periusiat atorlugu nuna ingerlanneqassasoq. Suna tamaat marloriaammik ingerlatsisunngorlugu, uani pineqarlutik Namminersorlutik Oqartussat, kommunit aamma suliffeqarfiit Namminersorlutik Oqartussanit ingerlanneqartut. Taakkunnnga allafissornerit milliardit koruunit atorneqarput, Hans Enoksen oqarpoq.

'Oqalliffiup' qallunaatoortaani Partii Naleqqap siulittaasuata tullia Per Rosing-Petersen apersorneqarpoq, tassanilu nunatsinnut tikillutik suliartortartut aamma eqqartorneqarput.

- Suliffissat 1.000-it Asiameersut tigusarpaat, nunarpullu 56.000-nik inoqartumut sunniuteqartorujussuusarluni inuiaqatigiinnut. Tikillutik suliartortartut annikillisaavigineqanngikkunik unitsinneqartariaqarput, Per Rosing-Petersen apersorneqarnermini nassuiaavoq.

'Oqalliffimmi'-li aqutsisup tikkuarpaa nunatsinni Thailandimeersut Filipinameersullu 2013-imi 271-iusut.

Powered by Labrador CMS