Partii Naleraq: Akitsuutit naammaleqaat

- Innuttaasut nunatsinni najugaqartut amerlaqisut maanna aningaasaatiminnik naammattusaareqqissaarlutik inuuniarnerat oqitsuinnaanngilaq. Partii Naleqqamiillu isumaqarpugut pissutsit taama ittut atorneqartillugit akitsuutinik qaffaanissat inuiaqatigiinnut artukkeeqqinnissaq piffissaanngilluinnartoq.

Partii Naleqqamit Jens Napaattooq tusagassiutinut nalunaarummi allappoq.

Inatsisartut oqallittoqartarnerini akitsuusersueqqinnissamut akitsuutit qanoq inuiaqatigiinnut kinguneqartumik artukkeeqqinnissaat inatsisissamut siunnersuutigineqartuni ilaatigut ersersinneqanngitsut assersuutigaa.

Akitsuuseeqqinnissat akuerinngilaat

- Sapaatip akunnerata siuliani oqallinnerni arlaqartuni naalakkersuisuusut arlallit nassuiaateqaqquneqaraangata akissutissaqartannginneri akuerineqarsinnaanngitsutut ilanngullugu Partii Naleqqamit oqaatigerusupparput, Jens Napaattooq oqarpoq.

Naalakkersuisut akitsuusersueqqinnginnissaat taamaammat siunnersuutigaa.

Pisisinnaassutsip annertuneqarnissaa

- Avannaani qaleralinnut akitsuut peernissaa kissatigaarput. Snescooterit, atv, 4-hjulillu akitsuutaat piiarnissaat kissaatigaarput, oqarpoq.

- Aamma nunatta karsiata naatsorsuutai oqallisigineqarmata ilanngussarput eqqaaqqilaassavarput. Partii Naleqqamiimmi maluginianngitsuunngilarput ukioq 2017 akileraarutit akitsuutillu 100 million koruuninik annerusimasut. Tassani annerpaartai Namminersorlutik Oqartussat suliffeqarfiit pigisaasa ingerlatsiviit isertitaminnit akileraarutaasigut akiliutigisimammassuk.

- Piffissanngorsoraarpullu taakku suliffeqarfiit sinneqartoortarneri millisassallugit, inuiaqatigiinnut pisisinnaassuseq annertusarniarlugu, Jens Napaattooq oqarpoq.