Sisimiut
Partii Naleraq Sisimiuni immikkoortortamik pilersitsivoq
Partiip immikkoortortaani Henrik Fleischer siulittaasunngorpoq
Arfininngormat Partii Naleraq Sisimiuni innuttaasunut ataatsimiisitsivoq, qulequtarineqarlutik 'Naalagaaffinngornissaq, Naligiinnerulerneq aamma politikkikkut killiffik'.
Partii Naleqqamiit Inatsisartuni ilaasortaq Per Rosing-Petersen saqqummiivoq, taassumalu kingorna najuuttuni oqallinneq pivoq.
Namminersulerneq
Partiip nalunaarutigaa, oqallinnermi najuuttut akornanni isumaqatigiillutik isummersorfiusut tassaasut nunatsinni pisuussutit avataaniit iluaqutaaginnaratik nunatsinnut iluaqutaanerullutik kalaallinullu pitsaanerusumik agguataarnerunissaat, aamma isumaqatigiiffiusoq tassaasoq pissakinnerit ikiortariaqavissut piaartumik atukkamikkut aaqqiivigineqarnissaat.
Kiisalu naalagaaffinngornissap angorusunneqarnera annertuumik tamanit isumaqataaffiulluni.
Siulersuisut
Sisimiunilu Partii Naleqqap immikkoortortaqarfeqalernissaa piviusunngorpoq, najuuttuni piumassusillit siulersuisussatut sassarlutik qinigaammata, suliassallu annertuut aallartissallugit siunniummatigit, Sisimiunilu pisut qanimut malinnaaffigalugillu suleqataaffigissallugit.
Siulersuisut ima katiterneqarput:
- Siulittaasoq Henrik Fleischer
- Siulittaasup tullia Malene Ingemann
- Aningaaserisoq Tobias Fleischer
- Allatsi Arnajarak Olsen
- Siulersuisuni ilaasortaq Ulloriaq Olsen
- Sinniisussaq Peter Møller