Inatsisartut
Partii Naleraq: Inatsisartut ataatsimiinnerat radiokkut aallakaatinneqartariaqaraluarpoq
Innuttaasut inatsisartuni susoqarnersoq malinnaasinnaasariaqarput, taamaammat ataatsimiinnerit toqqaannartumik KNR Radiokkut aallakaatinneqariaqaraluarput, Anthon Frederiksen (PN) oqarpoq.
Inatsisartut upernaakkut ataatsimiinnerat aqagu sisamanngornermi aallartissaaq.
Inatsisartut ataatsimiinnerat KNR Radiokkut siorna tusarnaarneqarsinnaajunnaarpoq, oqallinnernillu soqutigisallit malinnaaniarunik isiginnaarutikkut malinnaasariaqalerput.
Naalakkersuisumut kajumissaarut
KNR Radiomi toqqaannartumik aallakaatitsisarneq uteqqittariaqarpoq, Anthon Frederiksen, Partii Naleqqameersoq isumaqarpoq.
- Innuttaasunit saaffigineqartarnerput tunngavigalugu taamaanili ilaatigut Naalakkersuisunut ataasiarata apeqquteqartarnerit aallaavigalugit saaffiginnittarpugut, kisianni ajoraluartumik maannamut kignuneqanngitsumik, Frederiksen tusagassiuutinut nalunaarummi oqarpoq.
Taamaammat ilinniartitaanermut, kultureqarnermut, ilisimatusarnermut naalakkersuisoq, Doris Jakobsen (S), KNR Radiomi ataatsimiinnerit aallakaatinneqartalernissaannut sulissuteqarnissaanut kajumissaarivoq.