Folketingimut qinersineq
Partii Naleraq Folketingimut qinigassanngortitaqassaaq
Partiimit Folketingimut qinigassanngortikkusuttut arlaqartuusut, partiip siulittaasuata tullia Sermtsiaq.AG-mut oqarpoq
- Partii Naleraq tunuliaqutaralugu Folketingimut qinigassanngortitaqassaaq.
Partiip siulittaasuata tullia Per Rosing-Petersen naqissusiivoq.
Partii Naleqqap Folketingimut qinigassanngortitsinissani qularigaa, partiip siulittaasuata Hans Enoksen sapaatip akunnerata siuliani oqariartuuteqarpoq. AG-mut aamma oqarpoq, qinigassanngortissinnaasunik amigaateqarlutik.
Kisianni tassa partii qinigassanngortitaqassasoq, partiip siulittaasuata tullia Per Rosing-Petersen erseqqissaavoq.
Partiimi arlaqartut qinigassanngortikkusuttut uppernarsarpaa. Kisiannili kikkut qinigassanngortissanersut siulersuisunit ataatsimiissutigineqaqqaassaaq, tamannalu sisamanngorpat tallimanngorpallu aalajangiunneqarumaarpoq.
- Qineqqusaartut saqqummiunneqarumaarput partiimi siulersuisut ataatsimeereerpata, Per Rosing-Petersen oqarpoq.