spindoktor nutaaq
Partii Naleraq allatsimik atorfinitsitsivoq
Ilisimatusarfimmi inuiaqatigiilerinermik kandidatitut ilinniarsimasoq, Inunnguaq Petrussen, Partii Naleqqami allatsitut atorfinippoq
Kalaallit Nunaanni partiit nutaajunersaat, Partii Naleraq, siorna pilersinneqartoq maanna allaffeqarfitsik nukittorsarpaat allatsimik atorfinitsitsinermikkut. Atorfinitsitsineq sapaatip akunnera kingulleq pivoq.
Inunnguaq Petrussen partiimi allatsinngorpoq, taanna ukioq manna Ilisimatusarfimmi inuiaqatigiilerinermi kandidatitut naammassivoq.
Politikkikkut oqaaseqartartoq
Taanna tv-ikkut aamma radiokkut Inatsisartunut aamma Folketingemut qinersisoqarnerini kingullermi ilaatigut politikkikkut oqaaseqartartutut ilisimaneqarpoq. Aammalu nipilersortarnermigut ilisarisimaneqarpoq, nuuteeraq Aanngalerneq saqqummerseqqammerlugu.
- Ulluinnarni aqutsisutut ilinniagarissaarnera pikkunnarnera, politikkimik ilisimasaqarnera aammalu inussiarnersuunera tunuliaqutigalugit atorfinitsipparput, Partii Naleqqami siulittaasup tullia, Per Rosing Petersen oqarpoq.
Taassuma erseqqissarpaa suleqatigiinnertik aallartilluareersoq.