Partii Naleqqap takissutsit misissuiffingeqquai
Partii Naleqqap Ilulissani Nuummilu 1.500 meterinik Qaqortumilu 1.500 meterimik mittarfiliortitsiinnartoqarsinnaanera misissuiffingeqquneqarpoq
Partii Naleraq naalakkersuisoqatigiinnermi peqataangaluarluni naalakkersuisuutitaqaraluarlunilu Ilulissani Nuummilu mittarfissualiortitsinissamut Siumumit allaanerulluinnartumik isummerpoq.
- 2015-imi Naalakkersuisoqatigiissimasut aalajangiinerminni toqqamaavigisaat aallaavigissagaanni taamaallaat 2200-miiterisut takitigisut uani aalajangiffiigisassami pineqarput, uanili pineqaratik mittarfiit naannerusut imminullu akilersinnaanerusut. Tamannalu toqqammavigalugu Partii Naleraq isumaqarpoq pineqartoq isummerfiginnginnerani ataatsimiititalianut marluusunut susassaqartunut misissortissallugu mittarfiit tamarmik 1199-miiterit inuiaqatigiinnut qanoq aningaasatigut kingunerisinnaasanik artukkiinnginnerusinnaasut ujartoqaarneqassannginnersut isumaliuutigineqaqqaarsinnaannginnersoq ujartorneqarpoq, Partii Naleqqami politikkikkut oqaaseqartartoq Jens Napaattooq oqarpoq.
Naalakkersuisoqatigiinnissamik isumaqatigiissut
Jens Napaattuup naalakkersuisoqatigiinnissamik isumaqatigiissut ilanngullugu tikkuarpaa.
- Naalakkersuisoqatigiinnissami isumaqatigiissutip takutippaa aaqqissuussineq aammalu pitsaanerpaaffimmut inissinneqassasoq, siunnersuutip saqqummiunneqartup tamanna tamakkiisumik qulakkeersimanngikkaa maluginiarparput, taamaattumillu ataatsimiititaliamut susassaqartumut ingerlatiinnarneqassasoq Partii Naleraq isumaqarpoq, Partii Naleqqami politikkikkut oqaaseqartartoq oqarpoq.
Oqaaseqartartup mittarfiliortitsisoqarnerani isorliunerusut ullumikkutatukkamikkut ajornartorsiuteqareeqisut artukkeqqinneqaqqinnginnissaat pingaartippaa.
Oqaluuserinnipallanneq
Aappassaaneerinnittoqarnissaanut pingajussaaneerinnittoqarnissaanullu apeqqut pillugu Partii Naleqqamit tapersersorneqarnersoq Jens Napaattuup akissutigaa, ataatsimiititaliani peqqissaartumik oqallisigineqarnissaa kissaatigaa.