Partii Naleqqap suiaqatiminoortartut pillugit oqarneq tapersinngilaa

Partii Naleraq sinnerlugu Inatsisartunut qinigassanngortittup Mads Peter Grønvoldip akuerisinnaanngilaa suiaqatiminoortartut oqaluffimmi katittalernissaat meeravissiartaartalernissaalluunniit, naak Atassutip Inuusuttaasa Inatsisartunut sassartitaata, Kajpeter Heinrichip, tamanna pisinnaasariaqartutut isumaqarfigigaluaraa.

Mads Peter Grønvoldimi isumaqarpoq suiaqatigiittartut oqaluffimmi katitinneqartalissappata tamanna Biibilip oqariartuutaanut naapertuutissanngitsoq.

- Biibilimi allassimavoq Mosesimik allakkat pingajuat kap. 18 vers 22:’ Anguteqatit arnatut ilillugu innaatissanngilat innaassineq taamaattoq maajunnartorsuummat’, Mads Peter Grønvold sisamanngornermi ullaap tungaani isummersorpoq imalu nangilluni:

- Aamma Paulusip Romamiunut allagaani kap. 1 vers 27 ilaatigut ima imaqarpoq: ‘Angutit kannguttaallutik anguteqatiminnik atoqateqartarput taamalu tammarnerminnut naleqquttumik pillaatisiaqalerlutik’.

Atuaruk: Suiaaqatiminoortartut oqaluffimmi katittalernissaannut akerliusoq

Atuaruk: Atassutip qineqqusaartitaa: Anguteqatiminoortartut meeravissiartaartalerlik

Partiiminit taperserneqanngilaq
Kisianni Mads Peter Grønvold nammineq partiiminit, Partii Naleqqamit, isummersornerminut taperserneqanngilaq.

- Partiip tungaaniit inussiarnersumik paatsoorneqarsinnaanngitsumilli erseqqisaatigissavarput, una Sermitsiaq.AG-mi Mads Peter Grønvoldip allagaa Partii Naleqqap politikkianut ilaanngimmat, Partii Naleqqap siulittaasuata tullia, Per Rosing-Petersen oqarpoq.

Mads Peter Grønvoldi isumaqaraluartoq politikerit Biibilip imarisai allanngortissinnaanngikkai, taava Partii Naleqqamit inuit pisinnaatitaaffii upperisarlu ataqqineqarput.

- Partii Naleqqap inuit pisinnaatitaaffii upperisarsiornermullu tunngasut ataqqilluinnarpai, immikkoortitsinermullu naqisimanninnermulluunniit peqataarusunngilluinnarpugut, Per Rosing-Petersen oqarpoq.

Nammineq inuttut isummersortoq
Pineqartullumi nammineq, Mads Peter Grønvoldip, ilisimanerarpaa isummersornini Partii Naleqqap politikkerinngikkaa.

- Naleqqap politikkerinngikkaa nalunngilara, kisianni uanga nammineq uanga una isummernerivara qinigassanngortittutut pisinnaatitaaffiga najoqqutaralugu, Mads Peter Grønvold, suli isumaqartoq Biibili politikerinit allanngortinneqarsinnaanngitsoq, oqarpoq.

- Nammineq uanga paasinnittaasera malillugu bibilip ajoqersuussutai malittussaavagut, taakkualu isumaqanngilanga politikkkkut allanngortinneqarsinnaasut, uanga tassa taama isummerpunga.

Atuaruk: Suiaqatigiit oqaluffimmi katissinnaanngungajalerput