qinersineq
Partii Naleqqap qinigassanngortitaa: Umiatsiaararsortunut ataasiakkaanut pisassiisoqartalerli
Partii Naleraq tunuliaqutaralugu Inatsisartunut qinigassanngortittup Anthon Lindenhann-ip Ilulissaneersup, umiatsiaararsortunut ataasiakkaanut pisassiisalernissaq eqqunniarpaa
KNR tallimanngormat unnukkut ukioq manna qineqqusaarnermi oqallinnermit siullermeersumik TV-kut aallakaatitsivoq, tassani partiit qinigassanngortittut tamarmik peqataalllutik, ilaatigullu qinersisartut apeqqutaat akissuteqarfigissallugit.
Inatsisartunut qinigassanngortittunut apeqquteqartut ilagaat Aron Petersen, Iluliarmiu, taassumalu Inatsisartunut qinigassanngortittut aperai umiatsiaararsortunut sapaatip akunneranut ulluni tallimani aalisartarnissaq eqqukkusunneraat, taamaasilluni qaleralinniarnermi pilerngulluni aalisarnermik taaneqartartoq umiatsiaararsortunit ullumikkuminngarnit eqqissisimanerusumik ingerlaqqullugu.
– Umiatsiaararsortut ataasiakkaarlugit pisassinneqartalertariaqarput, soorlu angallatit 6 meterit sinnerlugit angissusillit taamaasiorneqartut, Partii Naleraq tunuliaqutaralugu Inatsisartunut qinigassanngortittoq, aalisartoq Anthon Lindenhann, oqarpoq.
Umiatsiaararsortut iluatsitsinngikkunik
qaammammut pisassat annaasinnaavaat
Anthon Lindenhann isumaqarpoq aalisartut tamarmik, umiatsiaararsortuugunik angallatiliugunilluunniit, aalisarnermi assigiissumik atugassaqartariaqartut.
– Umiatsiaararsortut angallatitut 6 meterit sinnerlugit angissutilittut namminneq immikkut pisassinneqartartuugunik umiatsiaararsortut eqqissisimanerusumik aalisalissagaluarput, nammineq aalajangersinnaalerlugu pisassatik qaqugu aalisassanerlugit, Anthon Lindenhann Sermitsiaq.AG-mut oqarpoq.
Tassami umiatsiaararsortut ataatsimut pisassinneqartarput, taamaattumillu qaammammut pisassiissutit nungunnissaasa tungaanut sapinngisamik annertunerpaamik aalisarniartarlutik·
– Periuseq tamanna umiatsiaararsortunut peqqinnanngilaq. Tassami umiatsiaararsortut ilaat ajutooratarsinnaasarput motooriminnik ajornartorsiuteqalerlutik imaluunniit aalisarnermi atortuminnik annaaasaqarlutik, taavalu qaammammut pisassiissutinik aalisaqataasinnaanatik, Anthon Lindenhann oqarpoq, taamaattumillu isumaqarpoq aamma umiatsiaararsortut ataasiakkaarlugut qaammammut pisassinneqartalertariaqartut.
Akerlianik Atassut tunuliaqutaralugu Inatsisartunut qingiassanngortittup Tom Mølgaardip killeqanngitsumik, pisassiisoqarani, qaleralinniartalernissaq eqqunniarpaa, aalisartut namminneq aalajangertassallugu qanoq aallakulasartigissanerlutik.