Ineqarnermut akiliutit
Partii Naleqqap ineqarnermut akiliutit appartinniarpai
Inatsisartunut ilalasortaq Anthon Frederiksen, Partii Naleraq, ineqarnermut akiliutit pillugit Naalakkersuisunut arlalinnik apeqquteqarpoq
Inatsisartunut qineqqusaarnermi Partii Naleqqap pingaartitaasa ilagaat, partiip ineqarnermut akiliutit appartinniarmagit.
Maanna Partii Naleraq tunuliaqutaralugu Inatsisartunut ilaasortaq Anthon Frederiksen Naalakkersuisunut apeqquteqarpoq ineqarnermut akiliutit appartinnissaat eqqarsaatigalugu Naalakkersuisut qanoq pilersaaruteqarnersut.
– Naluneqanngilaq ilaqutariit inuillu ataasiakkaat inigisaminniit akiliisinnaajunnaarlutik anisitaasartut amerlasoorparujussuusut. Tassami inigisamut akilersuutit amerlanertigut ima qaffasitsigisarput, ilaqutariit ilaasa aningaasarsiaannut naapertuukkunnaavittarlutik, pingaartumik ilaqutariit suliffissaaleqinermik allatulluunniit ajornartoornermik, nappaammik assigisaanilluunniit eqqorneqartillugit, pisortaniit ikiorsiiniarneq ajornaatsuinnaanngitsoq tamanit ilisimaneqarpoq, Anthon Frederiksen paragraf 37 naapertorlugu apeqqummini tunngavilersuivoq.
Politikerip Partii Naleqqameersup apeqqutai tassaapput:
Maannakkut inuit ilaqutariilluunniit inigisaminniit anisitaasimasut qanoq amerlatigisut nalunaarsorneqarsimappat ?
Maannakkut inuit ilaqutariilluunniit inigisaminniit anisitaasussatut nalunaarsorneqarsimasut qanoq amerlatigippat ?
Inuit ilaqutariillu inigisaminnut anisitaasarnerat pinngitsoortinniarlugu naalakkersuisut qanoq iliuuseqarnissamik pilersaaruteqarpaat ?
inigisamut akiliutit ilaqutariit isertitaanni naapertuunnerusut pilersinneqarsinnaaneri naalakkersuisuniit eqqarsaatigineqarsinnaappaat ?
inigisamiit anisitsinermut aningaasartuutit, allaffissornermut il.il. qanoq amerlatigippat ?