Aalisarneq

Partii Naleqqap aalisartukkormiut atugarliornissaat ernumagaa

- Aalisartorpassuit, sulisartut ilaqutaariillu aalisartukkormiut sinerissami ukiup aallartinnissaanut ajornartorsiortussanngorput. Taama Naalakkersuisunut pisassiisoqaqqinnissaanut kaammattuuteqartoq, Partii Naleraq isumaqarpoq

Partii Naleqqap siulittaasua, Hans Enoksen, Naalakkersuisuugallartut piaartumik iliuuseqarnissaannut piumasaqarpoq

Naak saarullittassanut pisassiissutit 1.500 tonsinik qaammatip uuma ingerlanerani ilaneqaraluartut pisassat maanna nungulerput, tassa pingasunngorneq ukiup sinneranut tunisivissatut kingullertut aalajangiunneqarmat.

Tamannalu Partii Naleqqamit ernumartoqartinneqarpoq, taakkua Naalakkersuisuungallartunut ammasumik allagaqarlutik saarullittassanut sinerissamut pisassiissutit ilaneqarnissaannut kaammattuipput.

- Ukiup nutaap aallartinnissaanut sinerissami aalisartut saarullinniartut uningatinnarsinnaanngilagut, tassami allamik periarfissaqanngivipput, taamaatumik ilaqutaariippassuit inuuniarnerat ilungersunarsilluinnassanngippat Naalakkersuisuugallartut sukkasuumik saarullinnik pisasseeqqinnissamik sulisariaqarput.

Taama Partii-Naleqqap siulittaasua Hans Enoksen Naalakkersuisunut ammasumik allagaqarpoq.

Atuaruk: Saarullittassiissutit nungulersut

Atuaruk: Karl Lyberth: Saarullittassat ilaneqaqqillik

Naalakkersuisuungallartut partiit siulittaasuinik taperserneqarlutik sinerissap qanittuani saarullittassiissutit novembarip sisamaani 1.500 tonsinik ilavaat.

Kisianni Aalisarsinnaannermut Akuersissutinik Nakkutilliisoqarfimmit marlunngornermi nalunaarutigineqarpoq saarullinniarluni aalisarneq pingasunngornermi novembarip 19-ani unitsinneqartussanngortoq pisassiissutit nungulermata.

- Juulleriartulerpoq allamillu aningaasarsiorfiusinnaasumik aalisartut periarfissaarupput. Aamma taakkuinnaanngillat, aalisariutini inuttat, sulisartullu aamma periarfissaarupput. Ilaqutariippassuillu juullimi nuannaarlutik nalliuttorsiornissaat ernumanermik taarserneqarpoq. Pisassammi nungussimasut saarullinnik pisasseeqqinnikkut qaffanneqanngippata aatsaat ukioq nutaaq aallartippat aalisalersinnaapput tamannalu utaqqineqarsinnaanngilaq, Hans Enoksen allappoq, nangillunilu:

- Partii Naleqqamiit isumaqarluinnarpugut piaartumik qanoq iliuseqartoqartariaqartoq, qinersinissaq Naalakkersuisunngortussallu nutaat utaqqineqassappata aalisarneq unittoorluinnartoq aallartissinnaanngilaq, taamaattumik massakkut Naalakkersuisuugallartut Partiit siulittaasui peqatigalugit aalajangersaasariaqarput, inuuniarnikkummi atukkat ilungersunartorujussuarmik eqqorneqartussaapput ilaqutariippassuit ajorluinnartumik atugaqalernissaat aaqqiisoqanngippat takusinnaavarput.

Atuaruk: Saarullittassat 1.500 tonsinik ilaneqarput

Powered by Labrador CMS