Partii Naleqqami nikitsisinerujussuaq
Partii Naleqqap Inatsisartuni gruppia nutaanik ilaasortaqalissaaq
Hans Enoksen kisiartaalluni Partii Naleqqami qinigaaqqippoq. Partiimi qinigaalluartoq maanna Pele Broberg, Henrik Fleischer aamma Jens Napaatttooq suleqatigissavai. Henrik Fleischerilu nutaajunngilaq, partiimmi naalakkersuisoqatigiinnut suleqataalerlerani Hans Enoksen Naalakkersuisunngormat taassuma paarlappaa.
Taamaasillutik Anthon Frederiksen siullertut sinniisussanngortoq aammalu Per Rosing-Petersen qinersinermi taamaallaat 38-nik qinerneqartoq ilaasortaajunnaarput.
Pele Broberg qineqqusaarnerup naammassiartornerani ilaatigut namminiilivinnissaq pillugu inuit taasitinneqapallannissaannik siunnersuuteqarluni, nuimalluarpoq. Taassuma tv-kkut oqallitsitsinerit arlallit peqataaffigai, danskillu nutaarsiassaqartitsiviisa, nulialu Malene sisamaattut sinniisussanngortoq, soqutigilluarpaat.
Jens Napaattooq ingammik Upernavimmi Ittoqqortoormiinilu qinerneqarluarpoq. Siumumilu ilaasortaasimasoq 2007-mi Ineqarnermut Attaveqaqatigiinnermut Naalakkersuisuunermi nalaani akileraarutinik 130.000 koruuninik atuisimanera pillugu qaammatini sisamani pinerluuteqarsimasut inissiisarfianiittussanngorlugu pineqaatissinneqarpoq.