erfalasulertarneq pillugu oqallinneq
Partii Inuit: Sorsunnersuup aappaani ajunaartut asissunngilagut
Partii Inuit siulittaasuat Nikku Olsen aamma politikkikkut oqaaseqartartoq Aannguaq Poulsen Danmarkip tiguangaanerata nalliussinneqartarnera pillugu isummaminnik itisiliipput
Danmarkip tiguangaanerata ulluani erfalasup qiteqqunneqartarneranut Partii Inuit siulittaasuata Nikku Olsenip akerliunera amerlasuunit akerlerineqareersoq Partii Inuit akissuteqarput. Nikku Olsen ilaatigut oqaatigineqarpoq sorsunnersuarmi kingullermi toqutaasunut asissuisutut.
Partii Inuit aalajangiusimavaat Danmarkip tiguangaanerata ulluani aprilip qulingiluaani erfalasup qiteqquttarnera atorunnaartariaqartoq.
Nunasiaatilittut eqqarsariaaseq
- Ilumoorsinnaava ullaakkut iterluta erfalasoq qiteqqusimasoq takugutsigu tupalluta eqqarsassasugut; ”kinamitaavaana toqusimasoq?, Nikku Olsen aamma Aannguaq Poulsen tusagassiutinut nalunaarumminni allapput.
- Partii Inuit eqqortuusorinngilarput, naalagaaffiup Danmark’ip peqqusinera piinnarlugu, uagut inuiatut isumaqartinngisagut qulaatiinnarluta atuutsinniarneqarneri, Nikku Olsen aamma Aannguaq Poulsen oqarput.
Nikku Olsenip erseqqissarpaa sorsunnersuarmi kingullermi toqutaasut asissornissaat siunertarinngikkini.
- Sakortuumik erseqqissaatigissavara Inuit ajunaarsimasut eqqorneqarsimasulluunniit pineqanngilluinnarmata. Taamaattoq maluginiarluarpara matumani oqallilluartoqarmat, taamatut oqallinneq peqqinnartuuvoq eqqaamassavarpummi piffissaq nutaaq takkunnikuummat, Nikku Olsen oqarpoq.
Taanna aamma oqarpoq Nunatta Danmarkimut atanera pillugu isornartorsiuisarnini ingerlaannassasut.
Una miserratigissanngilara Nunasiaateqarpalaartumik pissusitoqaanut allanngortitserusuttuungama, Nikku Olsen oqarpoq.