qinersineq
Partii Inuit siulittaasua: Ajunngilagut
Partii Inuini qineqqusaartut arlallit Nuussuarmi Illorpumi katerimaarnermi namminneq aliikkusersuipput
Biilit unittarfianniilli tusaaneqarsinnaalereerpoq nipilersorpalaaq, neriuuteqarnerlu tassanili saqqummerpoq. Kisianni Sermitsiaq.AG-p aallartitaa iserami assut pakatsivoq. Tamaanimi inuit arfineq pingasut missaat Partii Inuit siulittaasuata tumerparpaarneranut, marluliaqataata basserneranut Randi Brobergillu erinarsorneranut tusarnaarput.
Kisianni nuannisarput. Naneruusersorsimapput, balloneqarlutik allagartarsuaqarlutillu.
- Ullumikkut ulapikkama ulloq malugerpianngilara, kisianni ajunngilagut, Nikku Olsen oqarpoq.
Partii Inuit siulittaasuata katerisimaarnerminnut takkuttukinnera nassuiaatissaqartippaa.
- Amerlasuut angerlarsimapput meeqqaminnillu innartitsillutik, aamma qineqqusaartitagut arlallit sinerissamiipput.
Partii Inuit naatsorsuutigaat matumik qinersinerup inernerata saqqummiunneqarnissaasa tungaannut ammatissallugit.