qinersineq
Partii Inuit: Nunanut allanut niuerneq nukittorsartariaqarpoq
Kalaallit Nunaat namminersulivikkaluarpalluunniit Danmarki pingaaruteqartussaavoq. Kisianni nunanut allanut ammanerulertariaqarpugut, Partii Inuinit Georg Olsen oqarpoq
Nunanut allanut oqartussaqarfiit Naalakkersuisut siulittaasuata akisussaaffigiunnaartariaqarpai. Niuernermut Nunanut Allanut Naalakkersuisoqarfimmik ataqatigiisillugit pilersitsisoqartariaqarpoq.
Partii Inuit tunuliaqutaralugit Inatsisartunut qinigassanngortittoq Georg Olsen, isumaqarpoq.
Naalakkersuisut siulittaasuusimasut nunanut allanut oqartussaqarfimmik suliartik tunulliuttarsimagaat isumaqarpoq.
- Kalaallit Nunaata nunanut allanut niueqateqarnera pitsaanerulissagaluarpoq niuernikkut nunanullu allanut Naalakkersuisoqarfimmik pilersitsisoqartuuppat. Nunarpummi Danmarkimut annertunerusumik maannakkut niuertarpoq, tamanna allanngortinneqartariaqarpoq, Georg Olsen oqarpoq.
Danmarkimik suleqateqarneq
- Partii Inuit pasillerneqartarput Danmarkimik mattussiniartuusutut. Taamaasiorusunngilagut. Danmarki uagutsinnut pingaaruteqartuuvoq. Namminersulivikkaluaruttaluunniit Danmarki pingaarutilinnik suleqatigineqartussaavoq. Nunanut allanut ammanerulernissarput ujartuinnarippununa, Georg Olsen Sermitsiaq.AG-mut oqarpoq.
Islandimut suleqateqarnerup pitsaanerulernissaa Partii Inuit tunuliaqutaralugit politikkerip siunnersuutigaa.
- Kalaallit Nunaat kinguariartorpallaartilertinnagu niuernikkut ullutsinnut naleqqunnerusumik aaqqissuussisoqartariaqalerpoq. Nunanut allanut suleqateqarnerup nukittornissaa anguniarlugu Danmarki isumaqatiginninniarfigineqartariaqarpoq niuernerup pitsaanerusumik ingerlalernissaa anguniarlugu, Georg Olsen oqarpoq.