KNR

Partii Inuit KNRip pisortassaa kalaalioqquaat

KNRimi pisortatut inuttassarsiuinermi qinnuteqarnissamut killigititaq qaanngiuppoq. Partii Inuit pakatsissutigaat pisortanngortussat kalaallisut oqaaseqartuunissaa piumasarineqanngimmat

Partii Inuits Randi Broberg. Foto: Leiff Josefsen

KNR-mi siulersuisut maanna isummerfigisussanngorpaat kina KNR-mi pisortatut atorfinitsinneqassanersoq. Partii Inuit Inatsisartuni ilaasortaatitaata Randi Brobergip aarleqqutigaa nunaqavissut mattunniarneqartut inuttassarsiuinermi kalaallisut oqaluttuunissaq immikkut piumasarineqanngimmat.

Randi Brobergip Inatsisartut Kultureqarnermut Ilinniartitaanermullu Ataatsimiititaliami siulittaasuusup maluginiarpaa inuttassarsiuinermi kalaallit oqaluttuunissaq immikkut piumasarineqanngitsoq.

Allamiut piumaneruaat?
- Taassuma erserseqqippaa, kalaallinik piukkunnartunik qinnuteqarsinnaasunik mattussineq, illuatungaanili allamiunik qinnuteqarsinnaasunik periarfissiineruneq. Soorlulusooq allamiumik pisortartaarnissamik siunertaqareerpasissumik, Randi Broberg tusagassiutinut nalunaarummini allappoq.

Taanna isumaqarpoq KNRip kalaallimik pisortaqalernissaa pingaaruteqarluinnartoq suliffeqarfik akileraartartunit aningaasalersugaammat. Taanna aamma isumaqarpoq atuisut inuunerat pisortanngortussat malinnaaffigisinnaasariaqaraa aammalu oqaloqatigisinnaasariaqassallugit.

- Taamaaliornikkut Knr suliffeqarfinnut allanut maligassiuiinnarani kalaallisut oqaatsitta nunatsinni pingaarnersaanerannik naqissusiissooq.

Kiisalu taamaaliornikkut kulturitsinnik kinaassutsitsinnillu pingaartitsineq ersersinneqassooq, pisortatullu atuisunut attaveqarsinnaaneq malinnaasinnaanerlu qulakkeerneqassalluni, Randi Broberg oqarpoq.

KNR-mi pisortatut qinnuteqarnissamut killigititaq tallimanngormat qaangiuppoq. KNRip siulersuisusa naatsorsuutigaat aasap ingerlanerani pisortanngortussat atornitsinneqarnissaanut isumaqatigiissut atsiorneqarsinnaajumaartoq.

Powered by Labrador CMS