partii inuit
Partii Inuit: Danmarkip nunarput sanngiillisarpaa
Partii Inuit naalagaaffeqatigiinnermiit aninissaq sulissutiginiarpaa. Partiip ataatsimeersuarnerani taama aalajangertoqarpoq
Nalunaarusiami 'Kalaallit Nunaannut Iluaqutissaq'-mi Kalaallit Nunaata namminiilivissinnaanera apeqquserneqarpoq. Partii Inuilli nunatta sukkanerusumik namminiilivinnissaa sulissutiginiarpaat.
Partii Inuit akunnerup naanerani ataatsimeersuarnerminni nunatta namminiilivinnissaa ilaatigut eqqartorpaat.
- Partii Inuit ataatsimeersuareerlutik nalunaarutigaat innuttaasunik sullissineq nukittorsarneqassappat avaqqunneqarsinnaanngitsoq inoqarfinni minnerpaaniluunniit innuttaaqataasut oqartussaaqataanerisa sukateriffigineqarnissaat, partiimi siulittaasunngoqqittoq Nikku Olsen oqarpoq.
Tunngaviusumik inatsit
Partii Inuit ataatsimeersuarnera ilutigalugu isumasioqatigiinneqarpoq. Oqalugiarpoq Islandimi Akureyerip universitetiani inatsisilerninermi ilisimatooq Agust Thor Arnason, taassuma Islandip namminiilivikkiartorneranut aqqutaasut oqalugiarnermini eqqartorpai, isumaqarporlu Kalaallit Nunaat namminiilivinnissaminut ernumassutissaqanngitsoq.
- Danmarkimik isumalluuteqartuarneq inuiaat kalaallit nukittorsaatiginngilarput sanngiillisaatigiinnarparput, partiimi siulittaasutut ingerlaqqittoq Nikku Olsen oqarpoq.
Nikku Olsenip Agust Thor Arnason isumaqatigaa nunarput namminiilivinnissaminut ernumassutissaqanngitsoq.
Kommunit iluarsineqassapput
- Aningaasatigut immitsinnut napatittunngornissarput ukiorpassuarni utaqqinagu sapernata nunatta tunngaviusumik inatsisissai maanna suliariniartigit, Danmarkimiillu kaanngarnissarput pilersaarusiorlutigu. Partii Inuit isumaqarput Danmarkimiit nammineersinnaanngitsutut naviasaarneqartuarnerput naammalersoq. Naalakkersuinikkut sukaterinitsigut nunatta pisuussutaanik nammineq iluaqutiginnissarput ammaanneqassammat. Takutittariaqalerparput inuiattut ataatsimoorluta nunarput nammineerluta aqussinnaallutigu, Nikku Olsen oqarpoq.
Ataatsimeersuarnermi inassutit immikkut maluginiagassat ilagaat Partii Inuit isumaqarmat ullutsinni kommuninut sisamaannarnut aggugaanerput pisariillisaanermik akikinnermik kinguneqanngitsoq, innuttaasullu kiffartuunneqarnerannik ajornerulersitsisoq. Partiip inassutigaa piaartumik pisortat sullissinerata nutarsarneqaraluarnera pitsanngorsaqqinneqassasoq, pisariaqarpallu kommunit siornatigutut aggugaanerat uterfigeqqinneqartariaqartoq.
Partiimi siulersuisut nutaat:
Siulittaasoq Nikku Olsen
Siulittaasup tullia Randi Broberg
Siulittaasup tulliata aappaa Aannguaq Poulsen
Siulersuisuni ilaasortat Miiti Lynge, Poul Bloch Jensen, Lars Erik Olsen aamma Joel Petersen.
Sinniisussanngorput Jens Peter Mølgaard aamma Peter Nguujuk Christensen.