ataatsimeersuarneq
Partii Inuit atertik allanngortinnialersaaraat
Partii Inuit aggustip qaammataani Narsami ataatsimeersuassaaq. Ataatsimeersuarnermi partiip atia ilaatigut eqqartorneqassaaq
Partii Inuit sapaammi 20. August 2017 Narsami ataatsimeersuassaaq, ataatsimeersuarneq sinerissamit peqataasussanit Facebookikkut livestream-erlugu toqqaannartumik malinnaavigineqarsinnaassaaq.
Partii tusagassiuutinut nalunaarummi allappoq.
Partiillu atiata taarserneqarnissaa eqqarsaatigineqartoq, aamma paasissutissiarineqarpoq.
- Siunissamut isigaluni piffissamut naleqqussarneq eqqarsaatigalugu Inuit Republik piukkunnartuusoq isumaliuutigineqarpoq, partii erseqqissaavoq.
Aqutsisut sanngiitsut
Nunarput allannguinissamik pisariaqartitsivoq, partiimit nalunaarutigineqarpoq.
- Nunatsinni politikkikkut aqutsineq assut sanngiippoq, allaanngilaq ersiorluni iluareqqusaarlunilu toqqorteqattaarluni nunatut ingerlaniarsarineq siuttuusunit ingerlanneqartoq, partii allappoq.
Nunarput avissaartuuffiunngitsumik toqqissisimasumillu aqunneqarnissaminut pisariaqartitsisoq partii isumaqarpoq.
- Politikkerinik qunusuitsunik pimoorussisunillu Nunatsinni aqutsisussanik pisariaqartitsivugut. Ataatsimeersuarnermi eqqartugassagut amerlapput. Ataatsimeersuarnissamulli inunnik sapiissusilinnik peqataarusussinnaasunik ujaasivugut, Partii Inuit oqarput.