Nuummi parnaarussivissaq
Parnaarussivik innutaasut ataatsimiinneranni eqqartussavaat
2012-p ingerlanerani Kommuneqarfik Sermersuup soqutigisaqatigiit tusarniaavigalugit ataatsimeeqatigisarsimavai parnaarussivissap inissiffissaa pillugu. Maannali akerliusoqalermat oqallinnissaq suli akuersaarpaat
Nuup ungataani Kuanninnguit tungaannut kommunip pilersaarutaa ukiamut saqqummiunnqaassaaq. Taamaammat suli piffissaqarpoq parnaarussivissap inissinneqarnissaa pillugu akerliliillunilu oqalliseqataanissamut, Kommuneqarfik Sermersooq taama ilisimatitsivoq.
Nuummi savinernut eqqaavissuup eqqaanut parnaarussivissap inissinneqarnissaa akerlerineqalerpoq. Akerliusut maanna piumasaraat inissiffissaa 500 meterimik nikisinneqassasoq asimut aqqut asserneqannginniassammat.
Kommuneqarfik Sermersuup aamma siunnersuutinik saqqummiussiffigineqarnissaani ammaffigaa oqallittoqassasorlu unnerlugu.
- Tamanna pissaaq, kommunimut pilersaarut nutaaq 2013-ip ukiaani tamanut saqqummiunneqarpat, tassani saqqummiunneqassallutik isertitsivissap inissisimaffissaanut ilusissaanullu tunngatillugu sukumiisumik aalajangersakkat. Tassunga atatillugu innuttaasunik soqutigisaqaqatigiinnillu tassunga attuumassuteqartunik ataatsimiisitsisoqartassaaq, illoqarfimmi pilersaarusiornermi pisortaq Niels Bennetzen oqarpoq.