Pan Am-ertoqannginnerani Minik: Akisussaaffimmik tigusisinnaasut arlaqarput

- U21-nut arlaleriarlunga Nunatsinni unammeqataanikuuvunga, kisianni unamminerni pingaarutilinni suli Nunatsinni unammeqataanikuunngilanga. Taamaammat Pan Amerikanske Mesterskabeqataanissanut qilanaarpunga.

Assammik arsartartoq 33-nik ukiulik Minik Dahl Høegh Sermitsiaq.AG-mut oqarpoq.

Minik Dahl Høegh seeqqukkut ukioq kingulleq ajoqquserpoq, Skanderborg Håndboldimilu januaarimi unammisartunngorluni.

- Pan Am-eqarnissaanut piareersimaniarlunga Skanderborg Håndboldimut nuuppunga. Klubbimut nuunnissara qulareqqaarsimagaluarpara, aqutsisuili oqaluutereerlugit qularunnaarpunga, tassami unammeqataaqattaartassasunga oqarfigimmanga, Minik Dahl Høegh oqaluttuarpoq.

- Kisianni ukiut marluk matumanisut unammisinnaananga suli malugisinnaavara. Kingullermik Pan Am-ertoqarnerani unammisartutut pitsaanerpaatut toqqarneqarpunga, kisianni Skanderborg Håndboldimut unammeqataanikka kingulliit pitsanngoriartorput siuariartorneralu malugilluarpara, oqarpoq.

Nukittuffipparujussuaqartut
- Kalaallit Nunaat VM-imut peqataavoq kingullermik 2007-mi. Taamani unammeqatigisartakkatit maannakkullu nunanut allanut unammisartut suna allaanerussutigaat?

- Tamarmik immikkut nukittuffeqarput. Taamani arsartut ataasiakkaat kivitsisinnaapput, maannakkulli unammeqatigisartakkakka amerlanerit kivitseqataasinnaapput. Tamanna nukittunerpaaffittut taasinnaavara. Kisianni målmandiusartoq Frank Mikkelsen, GOG-mi unammisartoq, suli peqataanissaa naluarput. Målmandigikkaluarpugut peqataassanngippalli uggorissavara, Minik Dahl Høegh akivoq.

- 33-nik ukioqalernikuuvutit. Pan Am peqataaffissat una kingulliua?

- 25-nik ukioqarunnaarsimanera malugisinnaavara. Tunniussassaqarluarlungali suli malugisinnaavara, taamaattumik kingullerpaamik peqataanissara naatsorsuutiginngilara. Eqqarsaatiginikuunngilara Pan Am-imi peqataanissara tassa peqataanera kingulliussasoq. Suli angusaqarluarusuppunga aamma VM-imut peqataaqqikkusuppunga, Minik Dahl Høegh akivoq.

Innuttaasunit naatsorsuuteqarfigineqarneq
- Pan Am-eqataanissinni suna unammillernarnerpaassava?

- Nunatsinni unamminerput qanoq tigusinnaaneripput unamminissatsinnut apeqqutaanerpaassaaq. Suleqatigiilluarluta unammeqattaarniarsarissaagut. VM-imut anngunnissarput innuttaasunit naatsorsuuteqarfigineqarpoq. Soorlu Uruguay-imut sungiusaatigalugu unamminikuuvugut, unamminerlu naammassivoq naligiilluta. Ullormi unammiffiusumi unammilluanngitsoorutta VM-imut anngutinngitsooriaannaavugut.

- Naatsorsuuteqarfigineqarneq qanoq malugisinnaaviuk?

- Ilaatigut takusarpara inuit qisuariaateqartut unamminigut tamarmik ajugaassagigut. Kisianni piviusoq allaavoq, tassami nunat Kalaallit Nunaannit inoqanerujussuit unammisussaavagut, unammisartuilu pikkorissorpassuaqarput. VM-imut anngussagutta annertoorujussuarmik angusaqassaagut. Taamaattumik oqareertoqarsinnaanngilaq VM-imut anngutissasugut, kisianni soorunami anngunniarluta peqataassaagut, oqarpoq.

- VM-imut anngutinngitsuussagussi pakatsissavit?

- 2006-mi kingullermik VM-imut annguppugut, Pan Am-eqataanigullu kingulliit peqataaffigut unammilluaraluaqaluta anngutinngitsoortarpugut, tamatigullu pakatsingaatsiartarpunga anngutinngitsooraangatta. Annikitsualuimmi peqqutaallutik ukiut ilaanni VM-imut anngutinngitsoortarpugut. Aap, pakatsissaanga VM-imut anngutinngitsuussagutta, Minik Dahl Høegh oqarpoq.