kommunit avinneri
Palle Jerimiassen: Sulisut soraarsiinnarsinnaanngilagut
Kommunimi sulisut Kommune Qeqertalimmut nuukkumanngitsut, suliffiisa attatiinnarneqarnissaat pillugu Avannaata Kommuniani borgmesterinngortussaq nassuiaateqarpoq.
- Qaasuitsup Kommuniani sulisut agguarneqarnerat sukkanerusinnaanera pillugu Ane Hansen isumaqatigaara. Sulianilu ima ittuni maleruaqqusat malinneqartussaapput, uanilu pisumi piffissaq sivisooq atorneqarsimavoq.
Avannaata Kommuniani borgmesterinngortussaq, Palle Jerimiassen (S), Ane Hansenip pingasunngormat isornartorsiunerata kingorna, Sermitsiaq.AG-mut oqaatigaa.
Taamaattoq Ane Hansenip kamaammisaarnera paasisinnaalluarpaa.
- Kommune Qeqertalik suliassarujussuaqarpoq, qitiusumimmi allaffik nutaamik pilersitsisussaapput, uagulli Avannaata Kommuniani sulisugut sulisoriinnartussaallutigit. Taakku sulisunik nutaanik pisariaqartitsipput, Palle Jerimiassen oqarpoq.
Kommune Qeqertalimmi borgmesterinngortussap Ane Hansenip paasisinnaanngilaaq, kommunimi sulisut aqqanillit Ilulissaniit Aasiannut nuukkumanngitsut, sooq Avannaata Kommuniani suliinnarnissaannik neqeroorfigitissimanersut.
Atuaruk: Qaasuitsup Kommuniani sulisut aqqanillit nuukkusunngitsut
- Nuukkumanngitsut suliffimmik neqeroorfigineqarnissaat pilersaarutaasimava?
- Naamik, pilersaarutaasimanngilaq. Nuukkumanngitsummi arlaqarput, imaasiallaannarnikkulli sulisut taama amerlatigisut soraarsissinnaanngilagut. Pisariaqartitsinerput aallaavigalugu suliffissaannik neqeroorfigineqarput, suliffissanimmi nutaamik pilersitsissalluta pilersaaruteqarpugut. Neqerooruteqarnerput aqqanillit tamarmik akueraat, taakkunannga ilaat maanna suliffigisatik attatiinnassavaat, sinneruttulli suliffimmut assigusumik neqeroorfigineqarlutik, Palle Jerimiassen akivoq.
- Sulisut taakkua aqqanillit ilaqutaqarput pilersungassaminnik, uangalu oqaatingiuarsimavara, politikeriusugut kommunit avinneqarnissaat aalajangiunnerani, sulisut iluamik pineqarnissaat aamma qulakkiingassaralutigit, Palle Jerimiassen oqarpoq.