Palle Jeremiassen: Takornariarpassuarnut qujaannarpugut
Ilulissani mittarfissuaqalerpat Qeqertarsuup tunuani nunatsinnilu inuussutissarsiornissamut periarfissat nutaat pilersinneqassapput. Taamaammat Avannaata Kommunia mittarfissuaqalerpat nunarsuup sinneranit tikittussarpassuarnut piareersaleruttorpoq.
Atlantikoq qulaallugu timmisartorsuarnut Ilulissani mittarfeqalissagaluarpat takornariarpassuaqalernissaa Ilulissani kissaatigineqanngilaq. Takornariaqarnerli ataavartoq Ilulissaniinnaanngitsorlu nunatta avannaa tamakkerlugu piusoq ornigineqarpoq, ingammik Qeqertarsuup tunuani.
- Takornariarpassuaqarusunngilagut. Takornariaqarnerli aaqqissuulluagaq aningaasaateqarluartunillu tikerartitsinissaq naatsorsuutigaarput, Avannaata Kommuniani borgmesteri Palle Jeremiassen (S) Qeqertarsuup tunuani ilisimatusarnernilu ikioqatigiinnerunissamut seminareqarnermi ammaanersiorluni oqaaseqarnermini taama oqarpoq.
Taamaammat Avannaata Kommuania akunnittarfiliornermi malittassanik aalajangersimasunik pilersitsiniarpoq:
- Akunnittarfiliortarnernik malitassanik aalajangersimasunik pilersitsissaagut, takornarianik tikisikkusutatsinnut naapertuuttunik. Takornarianut ornigarneqartartut takornariarpassuarnik ulikkaavissanngillat. Pinngortitaq immikkuullarissoq takornarianit takuniarneqarsinnaasariaqarpoq tikikkaangamillu immikkuullarissumik misigisaqartassallutik.
Kommuuni piareersarpoq
Kangiata Illorsuanik suliniut naammassineqangajalerpoq, sanaartorfigissaaneq aallartereerpoq aasamullu illorsuup sananeqarnera aallartissaaq. Suliniullu nutaaq Kommuni Danmarks Teknologiske Universiteti suleqatigalugu, arsarnernut misissuisarfittut qitiusoqarfik, aamma pilersaarusiorneqarpoq, taamaaliornikkuttakornariat ilisimatusartullu tikittalernissaat siunertarineqarluni.
- Taakku pigilernissaat qilanaaraarput, taakkuli piinnarlugit takornarianik tikeralertoqarnissaa mianersuutigissavarput, takornariammi amerlasuut pinngortitamiinneq misigisassatsialattut oqaatigisareerpaat, Palle Jeremiassen oqarpoq.
Professori qaaqquneqartoq
Kalaallit Nunaata aningaasaqarneranut tunngatillugu siunnersuisartuni siulittaasuusimasoq professori soraarneq Chresten Sørensen ulluni makkunani aamma Ilulissaniippoq.
Tanna mittarferujussuaqalerneratigut, Kangiata Illorsuartaarnikkut arsarnernullu misissuisarfittaarnikkut inuiaqatigiit aningaasaqarnerannut kommuninullu kingunerluutigisinnaasaanut misissueqqissaartussatut Avannaata Kommunianit suliakkerneqarsimvoq.
- Takornariat amerliartuaaruusaarneri amerlipiloornerisaluunniit inuiaqatigiit aningaasaqarnerannut sunniuteqarnerlussinnaanersut Chresten Sørenseni misissueqqissaartussaavoq. Taamatuttaaq takornariaqarneq, aalisarneq sulisoqarnerlu timmisartorujussuaqalernitsigut sunnerneqarsinnaanersut misissussallugit, Palle Jeremiassen oqarpoq.
Ilulissani mittarferujussuaqalerneratigut Ilulissanut Kalaallit Nunaatalu avannaanut aningaasaqarnikkut kinguneqarnerlussinnaaneranik Chresten Sørensen misissueqqissaarnera 2018-p ingerlanerani piariissagaa Avannaata Kommuniata naatsorsuutigaa.