Palasi kinguaassiuutitigut kanngunartuliortutut akiligassinneqarpoq

Avannaani palasi anaanamik inuusuttumik kanngunarsaasimasutut pineqaatissinneqarpoq. Taassuma meeqqani kuisitsinnissaanut allatsinniarsimavaa

Avannaani palasi kinguaassiuutitigut kanngunartuliortutut pineqaatissinneqarpoq.

Anaanaq 20-nik ukiulik 5.000 koruuninik taarsiiffigisassanngortinneqarpoq, februaarimi Qeqertarsuarmi palasimit kanngunartuliorfigineqarnermi kingorna. Taanna februaarip 4-aanni palasimukarsimavoq naalungiarsuummi kuisinnissaa allatsikkiartorlugu, palasimilli kanngunartuliorfigineqarsimalluni.
– Kusanaqigavit, palasi oqarpoq assanilu arnap seeqquanut piseriarlugu uppataatigut attuualaalersimallugu.
Assani uppataanut unitseriarlugit arnaq qungasiatigut saamiatungaatigut kunippaa.
Arnap pisimasoq tamanna ulloq taanna politiinut nalunaarutigaa, Eqqartuussivillu pisimasumi aalajangeeqqammerpoq.
Palasi, kingorna atorfimminit tunuarsimasoq, ukiup ataatsip iluani kanngunartulioqqikkuni ulluni 14-ini pinerluuteqarsimasunut inissiisarfimmiittussanngortinneqarpoq kiisalu arnamut 20-nik ukiulimmut 5.000 koruuninik akiliisussanngortinneqarluni.

Powered by Labrador CMS