Paasissutissiissut: Naalakkersuisut akunnerit 31-t iluani uppisinneqartut

Akerliussutsimik takutitsisunit illuatungiliuttuniillu annertuumik tatisimaneqareerlutik Naalakkersuisut uppisinneqarput. Siunissami septembarip 30-t aamma oktobarip aallaqqaataat eqqaamaneqassaaq.

Naalakkersuisut siulittaasuata Aleqa Hammondip nunatta karsianit 106.363,27 koruuninik namminerminut ilaquttaminullu atuisimanera pillugu taama kinguneqartitsosqarpoq.

Inatsisartut ataatsimiinnissaat sioqqullugu innuttaasut amerlasuut akerliussutsimik takutitsipput marlunngormat. Tassanngaannit pissutsit sukkasuumik ingerlapput, qinersisoqarnissaami pingasunngormat suaarutigineqarpoq.

Akunnerni 31-ni pisut ataani takoqqinneqarsinnaapput.

Marlunngorneq septembarip 30-at

Akerliussutsimut takutitsinissamut inuppassuit peqataanissaannik suaaruteqarneq eqquuppoq marlunngornermi. Naalakkersuisunut akerliussutsimik takutitsisoqarpoq.

Akerliussutsimik takutitsisut 500-600 missaanniittut Nuummi Amisut eqqaanni nalunaaqutaq 10.00 naapipput. Annaassisitta oqaluffia sanioqqullugu ingerlaaqatigiipput. Inatsisartuni ilaasortat ukiaanerani ataatsimiinnerup ammannginnerani pisarnertut naalagiaqatigiipput.

Marlunngornermi nalunaaqutaq 10.00

Naalakkersuisut siulittaasuata Aleqa Hammondip Inatsisartuni Naalakkersuisunilu sulinngiffeqarnissamik qinnuteqaataa Inatsisartuni suli oqallisigineqarpoq. Inatsisartut nalunaaqutaq 16.50-ip tungaanut unikkallarput.

Marlunngorneq nalunaaqutaq 17.44

Illuatungiliuttut Naalakkersuisut siulittaasuannik Siumumeersumik Aleqa Hammondimik tatiginninnginnermik taasititsinerat Siumumit Atassummiillu pinngitsoortinneqarpoq.

15-14-mik amerlanerussuteqarlutik taasipput.

Inuit Ataqatigiinnit siunnersuutigineqartoq Demokraatinit, Partii Naleqqamit Partii Inuinillu isumaqatigineqarpoq.

- Aalajangiisinnaassusersi naapertorlugu iliuuseqartariaqaraluarpusi. Innuttaasut aalassassimaartut tamatta takusinnaavarput, Partii Naleqqap siilittaasua Hans Enoksen oqarpoq.

Tamannali Siumumit Atassummiillu isumaqatigineqanngilaq.

- Inatsisiliarineqarsimasut neriuutigaara malinneqarumaartut. Neriuutigaara paasineqassasoq nunatta karsiannit ilaqutanut, hotelini ineqarnernut assigisaannullu aningaasat atorneqarneq ajortut, Juliane Henningsen oqarpoq.

Pingasunngorneq oktobarip aallaqqaataa

Nalunaaqutaq 09.12:

Ilinniartitaanermut, kultureqarnermut, naligiissitaanermut ilageeqarnermullu naalakkersuisoq Nick Nielsen, Siumut, inuussutissarsiornermut aatsitassarsiornermullu naalakkersuisoq Siumumeersoq Jens-Erik Kirkegaard kiisalu peqqissutsimut attaveqarnermullu naalakkersuisoq Atassummit Steen Lynge naalakkersuisutut tunuarput.

Nalunaaqutaq 09.58:

Ineqarnermut naalakkersuisoq Siverth K. Heilmann, Atassut, nalunaarpoq Atassut Naalakkersuisooqataajunnaartoq.

Inatsisartut ataatsimiinnissaat sioqqullugu naalagiaqatigiittoqareersoq akerliussutsimik takutitsisoqarnera aamma Siverth K. Heilmannimut eqquivoq.

Nalunaaqutaq 10.00

- Inuiattut assuutigut atortillugit aatsaat taama kanngusutsigaanga. Inatsisartunut ullaaq ilaasortaavunga, maannakkut ilaasortaajunnaarpunga. Tusagassiutinut nalunaarutip nassiunneqarnerani kukkusoqarnera pissutaalluni nalunaarutigineqanngilaq aamma uanga Naalakkersuisunut ilaasortaajunaartunga. Steeni tunuarmat uanga aamma assinganik iliuuseqarpunga, Siverth K. Heilmann oqarpoq.

Pingasunngornerup ualinerani:

Naalakkersuisut siulittaasuat marlunngorpat qinersinissamik suaaruteqassappat siusinnerpaamik novembarip 28-ani Inatsisartunut qinersisoqassaaq.

- Sapaatip akunnera una Inatsisartut ataatsimeeqqissanngillat. Ataatsimiinnissaagaluit sapaatip akunnerata tullianut kinguartipput, Inatsisartut siulittaasuat Lars-Emil Johansen nalunaaruteqarpoq. Taamaasilluni nalunaarutigaa Inatsisartut oktobarip arfineq aappaanni ataatsimiinnerat ingerlateqqinneqarnissaat.

Pingasunngorneq nalunaaqutaq 14.27:

Atassummit oqaaserineqartut arlaqartunit paatsuungassutigineqarpoq pingasunngornermi. Partiili maannakkut naqissusiivoq - qinersisoqarnissaa piumasaqaatigaat.

- Tamanna tunngavigalugu Naalakkersuisut Siulittaasuat matumuuna kaammattussavarput Inatsisartunut qinersinissaq suaarutigeqqullugu taamatuttaaq Atassummit qinigaajumaartussat kaammattussavagut siunissamut isigisumik qulaajassagaat nunatta karsiata aningaasaataasa ingerlanneqarnerat pillugu inatsisitigut toqqammavigineqartut naammannersut iluarsisassartaqassappatalu tamanna isumannaarneqaqqullugu, Atassummit tusagassiutinut nalunaaruteqartoqarpoq pingasunngornerup ualinerani.

Tusagassiutinut nalunaarut partiimi siulittaasumit Knud Kristiansenimit, partiimi siulittaasup tullianit Steen Lyngemit kiisalu aaqqissuussaanermi siulittaasup tullianit Paninguak´ M. Krusemit atsiorneqarpoq.

- Taamaattorli pisut tunngavigalugit nunatsinni naalakkersuinikkut ingerlatsinermut tunngatillugu maannakkut ersarissumik maannangaaq nalunaaruteqarnissarput toqqarparput, Atassummit nalunaarutigineqarpoq.

Inuit Ataqatigiit, Demokraatit aamma Partii Naleraq qinersisoqarnissaanik piumasaqaateqartareerput.

Partii Inuinit suli nalunaarutigineqanngilaq partii sumi inissisimanersoq. Partiimi siulittaasoq Nikku Olsen illuatungiliuttut allat peqatigalugit tusagassiutinut aggustip 29-ani nalunaaruteqartareerput qinersisoqarnissaanik.

Partii Inuit Inatsisartuni ataatsimik ilaasortaqarput, taamaattumik Siumumik suleqateqalissagaluarunik illuatungiliuttut suli amerlanerussuteqassapput.

Pingasunngorneq nalunaaqutaq 16.08:

Aleqa Hammondip partiia nalunaaruteqarpoq, Siumumi siulittaasutut tunuarsimasoq.

Siumumi siulersuisut Aleqa Hammondip siulittaasutut tunuarnera akueraat. Partii immikkut ataatsimeersuannginnerani Jørgen Wæver Johansen siulittaasuugallassaaq, aamma ataatsimeersuartoqarnissaata tungaanut Karl Kristian Kruse politikkikkut siulittaasup tulliatut inissisimagallassaaq.

Pingasunngorneq nalunaaqutaq 16.59:

Inatsisartunut qinersisoqartussanngorpoq novembarip 28-ani.

Tamanna Naalakkersuisunut siulittaasuugallarput Kim Kielsenip tusagassiortunik katersortitsinermini nalunaaquttap 17.00-ip missaani nalunaarutigaa.

Kukkunersiuinermut Ataatsimiititaliamit nalunaarutigineqartareerpoq Aleqa Hammond nunatta karsianit 106.363,27 koruuninik namminerminut ilaquttaminullu atuisimasoq. Taakku maajip 28-anit 2013-mit maajip 21-anut 2014-mut aningaasat atorneqarput. Naak akiliisoqarnissaanik allagarsiisoqartaraluartoq akiligassarineqartut septembarip arfineq pingajuanni aatsaat akilerneqarput.

Pingasunngorneq nalunaaqutaq 21.00:

Naalakkersuisut siulittaasorigallagaata Kim Kielsenip Inatsisartunut qinersisoqarnissaa novembarip 28-ani ingerlanneqassasoq suaarutigaa pingasunngornermi.

Inatsisartut immikkut ataatsimiisinneqarneranni pingasuungornermi tamanna nalunaarutigineqarpoq.

Marlunngornermi qinersisoqartarnera periuserineqaraluarpoq, novembarip 28-anili tallimanngornermi qinersisoqassaaq.