erngup nukinga
Paasisat nutaat: Innaallagissamik Canadamut tuniniaasoqarsinnaavoq
Nuummit Canadami Iqalunnut immap naqqatigut kabeli 800 kilometerinik takissusilik atorlugu innaallagissamik avammut tuniniaasoqarsinnaavoq
Nunatsinnit erngup nukinganit innaallagissamik Canadamut Amerikallu Avannarliup sinneranut tuniniaasoqarsinnaavoq.
Tamanna misissuinerup nutaap, professor Arne Villumsenip, Kalaallit Nunaanni Nutaaliorfimmeersup, takutippaa, tamannalu canadami Nunatsiaq Newsip allaaserigaa.
Villumsenip nalunaarusiaa 2015-imi novembarimeersuuvoq, tassanilu allassimavoq Kalaallit Nunaanni erngup nukinganik nukissiorfiit tallimat innaallagissamik pisariaqartitatsinnik pilersorsinnaallutalu innaallagissap sinnera Nunavummut imaluunniit Newfoundlandimut tuniniarneqarsinnaasoq immap naqqatigut kabeli atorlugu.
Canadamut immap naqqatigut kabeli
Arne Villumsenip misissuinera nalunaarusiaannaagallartutut taaneqarpoq, tassaniippullu atlantikup avannaani nukissamik pilersuinermut attaveqaatinut periarfissaasinnaasut, tassuunakkut Island, Shetlandsøerne, Kalaallit Nunaat Canadalu attavilerneqarsinnaallutik.
Titartakkat ilaqarput Nuummit Canadami Iqalunnut immap naqqatigut kabeli 800 kilometerinik takissusilik.
Annertusineqarsinnaavoq
Nunavummi illoqarfiit pingaarnersaat 6.000-t sinnilaaginnarlugit inoqaraluartoq, taamalu Nukissiorfinnut tuniniaavissatut pilerinartutut oqaatigineqarsinnaanngikkaluartoq, attaveqaat immaqa Canadap Amerikallu Avannarliup sinneranut annertusineqarsinnaavoq.
– Kalaallit Nunaat ukiut 30-t matuma siornatigut Islandip atugaatut atugaqarpoq, taamanikkut aalajangerneqartussaalluni innaallagissamik annertunerusumik ineriartortitsineq akilersinnaanersoq, professori oqarpoq.