inuusuttut ilinniarnerat
Paasisassarsiorluni angalanerup inuusuttut Aasianni GU-mut piareersassagai
Inuusuttut Ilulissaneersut Aasiannut paasisassarsiorlutik sapaatip-akunnerani tullermi angalassapput ilinniarnertuunngorniarnerup qanoq ittuunera paasisaqarfigiumallugu
Ilulissani meeqqat atuarfianni 10. klassimi atuartut sunngiffimmi neqeroorut Sapiik, suliniummi suleqataasut marluk namminnerlu kajumissutsiminnik suleqataasut ukioq atuarfiusoq tamakkerlugu atuartunik kaammattuillutillu ikorfartuiffigisaat, aqqutigalugu ilinniarnertuunngorniarfeqarfimmut Aasiannut paasisassarsiorlutik angalangajalerput.
Foreningen Grønlandske Børn suliniummut Sapiimmut tunuliaqutaasoq erseqqissaavoq, inuusuttut ilinniakkaminnik toqqaanissaat aalajangernerusartoq angisooq, tamanna amerlasuunut ikinngutit ilaquttallu inuulluaqqullugit illoqarfimmi allami inuunerup nutaap aallartinnissaanik isumaqartarmat.
- Ilinniagaqarniarluni aalajangernissaq sapiissutsimik nukittussutsimillu piumasaqarfiusarpoq, tamatumalu saniatigut inuusuttutut ilinniagaqarnissamut periarfissanik ilisimasaqarluarnissaq paasisimasaqarluarnissarlu pisariaqartarluni, Gunver Justesen, Foreningen Grønlandske Børnimi Sapiimmik suliniummut aqutsisoq, oqarpoq.
Atuaruk: Interview: Aasiaats nye rektor er faldet til
Atuartitsinermut peqataassasut
Inuusuttut toqqaanissamut pitsaanerpaamik tunngavissaqartikkumallugit Ilulissani meeqqat atuarfianni ilinniartut 15-it Sapiik aqqutigalugu paasisassarsiorlutik angalassapput.
Inuusuttut GUX-imi atuartitsinermut malinnaassapput, kollegianilu inuusuttunit allanit angallanneqassallutik, kiisalu ilinniartuuneq kollegianilu najugaqarneq pillugit oqaluttuunneqassallutik. Kollegiami nerisarineqartartunik aamma nerissapput taamaalillutillu kollegiani najugaqarneq paasisaqarfigilluassallugu, suliniummi suleqataasut paasissutissiipput.
- Inuusuttut meeqqat atuarfiata kingorna sulerinissaminnik toqqaanissaat aalajangernerusarpoq angisooq. GUX-imut tikeraarnermikkut imminnut naleqquttuunersoq naliliiffigisinnaanngussavaat Aasiannilu najugaqarneq piareersarfigisinnaanngussallugu, Gunver Justesen oqarpoq.
Taanna erseqqissaalluni oqarpoq, taamaaliornikkut ilinniakkaminnik naammassinninnissamut periarfissaat annerujussuanngussasoq.
Aamma atuaruk: Oqariartuut: Qallunaatoorsinnaannginnerup pissutigisaanik ilinniarneq unitsiinnarneqarsinnaavoq