Inatsisartut ataatsimiittarfiat
Paasinnippoq ataqqinnillunilu
Inatsisartut siulittaasuata akerliussutsimik takutitsisut amerlassusaat tupaallaatigaa
– Maanna paasisinnaalerpara Nuummiorpassuit Aqqaluks Pladsimi Inatsisartut nutaamik ataatsimiittarfissaanik sananissaq akerlerimmassuk, Inatsisartut siulittaasuat Lars-Emil Johansen oqarpoq, Sermitsiaq.AG-p qinnuigimmani manna tikillugu Nunatsinni akerliussutsimik takutitsinerit annersaat oqaaseqarfigeqqullugu.
– Allaammi isumaqarpunga namminersornerulernissamut akerliussutsimik takutitsisarnerni taama aalassatsitsitigisoqartartoq. Maannali Kommuneqarfik Sermersooq aalajangiisussanngorpoq, Lars-Emil Johansen akerliussutsimik takutitsinersuup aqaguani oqarpoq.
– Akerliussutsimik takutitsisutnalunaajaataat paasillugulu ataqqivara, Lars-Emil Johansen oqarpoq.
Akerliussutsimik takutitsinermi najuuppit?
– Naami najuutinngilanga. Ilisimagisimagaluarpara qaaqquneqassallunga, qaaqqusisoqanngilarli, Inatsisartut siulittaasuat oqarpoq.
– Pitsaaginnarpoq innuttaasut akornanni taama oqallittoqartigimmat, pitsaasuunngilarli inuit isumaqarmata tamanna uanga suliniutigigiga, Lars-Emil Johansen oqarpoq.
– Uanga nammineq suliniutiginngilara. Ukioq, novembarip 27-anni, Inatsisartuni amerlanerussuteeqartunit suliassinneqarpugut illumut nutaamut siunnersuusioqqulluta, 3 millioner koruuninik, sipporneqaqqusaanngitsunik, atugassinneqarluta. Uagut (Inatsisartuni siulittaasoqarfik, aaqqiss.) Nuummilu borgmesteri upernaap ingerlanerani suliniut pillugu arlaleriarluta ataatsimeeqatigiittarsimavugut. Ataatsimiittarnerit kinguneqarput inissiiffissanik pingasunik siunnersuuteqarnermik, taakkulu aamma allaaserineqarsimapput, Lars-Emil Johansen oqaluttuarpoq.
– Taamaattumik paasisinnaanngilara inuit isumaqarmata uanga suliniutigigiga, taanna oqarpoq.