Royal Greenland
Paamiuni ukioq tunisassiorfiulluartoq
Nipisat suaannik aamma saarulliit nerpiinik tunisassiortalerneq tunisassiorfimmi tunisassiornerulernermik nassataqarsimavoq aamma illoqarfimmi suliffissaqartitsinikkut sunniuteqarluarsimavoq
Royal Greenlandip Paamiuni tunisassiorfiani ingerlatsisup Ilannguaq Abrahamsenip tunisassiorfiup 2015-mi angusai naammagisimaarpai.
Nipisat suaannik aamma saarulliit nerpiinik tunisassiortalerneq tunisassiorfimmi tunisassiornerulernermik nassataqarsimavoq aamma illoqarfimmi suliffissaqartitsinikkut ukiuni kingullerni sunniuteqarluarsimavoq.
Royal Greenland nittartakkami taama allappoq.
Suliassaqarfiunerusoq
Tunisassiorfimmi ingerlatsisup aamma oqaatigaa ukioq 2015 ukiup siulianut sanilliullugu suliassaqarfiunerusimasoq. Siorna upernaakkut tunisassiorfik nipisat suaannik tunisassiulerpoq juunimilu saarulliit nerpiinik tunisassiorneq aamma aallartilluni.
- Ukiakkut suliassat nalinginnaasumik annikillisarput, siornali kilisaatit septemberimiit decemberip tungaanut saarullinnik tunitsivimmut tunisisarput. Taamaattumik tunisassiorfimmi sulisut 30-nik amerlivavut, tassa katillugit 130-t sulisorilerlutigik, Ilannguaq Abrahamsen oqarpoq.
Atuaruk: Royal Greenlandip siuariartornini ingerlatiinnarpaa
Suleqatigiinneq nukittunerusoq
Ukioq 2015 unamminartuusimasoq taanna oqarpoq.
- Ukioq 2015 tunisassiorfiusoq ataatsimut isigalugu ajunngilluinnartumik ingerlavoq ilinniarfiullunilu aamma tunisassianik nutaanik tunisassiuleratta. Sulisut aqutsisullu suleqatigiilluarpugut aamma suleqatigiinnerput nukittunerulerpoq. Neriuutigaara suleqatigiilluarnerput 2016-imi ingerlaannarumaartoq, Ilannguaq Abrahamsen oqarpoq.
Paamiuni Royal Greenlandip tunisassiorfia aamma saattuanik tunisassiortarpoq.