Paamiuni nnuttaasut soqutiginneqisut

Inuusuttut mikaniikerit, biilinik angisuunik biilersinnaasut allallu soqutiginneqalutik marlunngornermi paasititsiniaanermi aggerput. Suliffeqarfiit Paamiuliarput rubininik piiaaffiliassaq pillugu paasititsiniaajartorlutiktaakkumi kissaatigaat Paamiunit Qeqertarsuatsiaanit Nuummiillu sulisussarserusupput. Suliniut Aappaluttoq naalakkersuisunit akuersissummik septembarip 12-ni tunineqarnissartik naatsorsuutigaat.

Nunami suliffinnik ingerlatsisut LNS Greenland A/S aqquserngit umiarsualiviit inissiat nerisarfiit maskiinaleriffiit ujaqqanillu immikkoortitseriffissaq sanaartortussaavai, tamannalumi pissutaalluni Paamiunit ilaatigut sulisussarsiorput.

Kommuneqarfik Sermersuumi suliffissarsiuussisarfik attaveqarfigineqareerpoq 60-nik sulisussarsiornissamut atatillugu, Paamiuneersullu qinnuteqartut sulisussarsiarineqassasut suliffeqarfiit oqaluttuarput.

Sulisussat 20 – 30-t sinneri Nuummi sulissapput, ujaqqanik immikkoortitserissallutik. Saqqummiiartortut ilisimatitsissutigaat SIK-p akissaataanit qaffasinnerulaartumik sulisussat akissarsiaqartinneqassasut, suliffeqarfiillumi ilimagaat rubinisiorfik ukiuni 9-ni piaaffiujumaartoq, kaaviaartinneqarumaartullu katillugit 180 milliuuni koruunit. Rubininik piiaaffissaq qaammatini 8-ni suliffiusassaaq, qaammatini sinnerini nakkutiginnittartussanik iluarsaasartussanillu sulisoqartassaaq.

Paamiuni paasititsiniaanermi tusarnaartut apeqqutissaqarluarpummi, sillimaniarnermut, sulisussat angerlarallartarnissaannut tunngasunik apeqquteqartarput. Avatangiisimik mingutsitsinermut tunngasut aamma apeqqutigineqarput. LNS Greenland aamma ilisimatitsivoq aalisartut piniartullu peqatigiiffii attavigineqareersut, kalaaliminernik suliffeqarfimmut tuniniaasinnaanermut tunngatillugu.