Paamiuni isumatusaartumik eqqagassalerineq

Paamiut eqqagassalerinerup tungaatigut Kommuneqarfik Sermersuumi siuttuvoq.

Tassami Paamiuni tigooraavimmi eqqagassat assigiinngitsut ingerlaartinneqarput. Qisuit, igalaamernit, savimernit, nerisassiornermi sinnikut aamma eqqagassat avatangiisinut navianaatillit.

- Maani Paamiuni eqqagassalerineq immikkoortiterinerlu suliarisarpavut. Ullut qulit missaat qaangiukkaangata Nuummut containerimik igitassanik ikuallaasarfimmut nassiussisarpugut, tassanilu ikuallanneqartarput, Peter Jonassen kommunimut oqaluttuarpoq.

Atuaruk: Ilulissat Aasiaallu nutaanik ikuallaavittaassapput

Nuummut Danamarkimullu angallanneqartartut
Eqqakkat Paamiuneersut Nuummuinnaq ingerlanneqarneq ajorput. Eqqakkat avatangiisinut navianaatillit igalaamernillu immikkoorteqqissaarneqartarput pisariaqartitsinerlu naapertorlugu umiarsuarmik Danmarkimut nassiunneqartarlutik.

Paamiuni eqqagassalerineq siusinnerusumi pissutsinut naleqqiussassaanngilluinnarpoq. Siusinnerusukkummi eqqakkat illoqarfiup eqqaavianut ataatsimorsuaq akulerullugit kueraannarneqartarput.

Inatsit nutaaq
Avatangiisit pillugit inatsit nutaaq 2006-imeersoq malillugu eqqaavissuarmut eqqakkanik ikuallaaneq ajornarsivoq. Ukiut marluk qaangiupput eqqaavissuarmi iluarsaassineq aallartimmat eqqakkanillu immikkoortiterilluni periuseq aallartinneqarluni. Saviminertallit, illumi atortorissaarutikut eqqakkallu avatangiisinut navianaatillit taamani eqqaavimmit piiarneqarput, eqqaaveqarfiusimasorlu ullumikkut igitanut poortoriikkanut ilioraaviuvoq.

Brugsenip, Pilersuisup najugaqarfiillu eqqaannut igalaaminernut saviminernullu katersuiviit iliorarneqarput. Taamaasiornikkut igitassat atoqqinneqarsinnaasut eqqortumik iliorarnissaat ersarissivoq.

Atuaruk: Nuummi januarip aallaqqaataani puiaasanik immikkoortitsineq aallartissaaq

Igalaamernit atoqqinneqartartut
Qillertuusat igalaamernillu Danmarkimut nassiunneqartarput, igalaamerngilli aamma allatut atoqqinneqarniarput.

- Piffissap ingerlanerani igalaamernit aserorterlugit maani atoqqinneqarsinnaanerat naatsorsuutigaarput. Isumaavormi assakkanut immiutitut ledningilersuinermilu atorneqarnissaat, maannali igalaamernit suli annikippallaarput, taamaattumik igalaamernit containerinut suli katersorusaarpavut, Margrethe R Hegelund, Teknikkimut immikkoortortami aqutsisuusoq oqarpoq.

Nuummi Kommuneqarfik Sermersooq Paamiut tungaanut aamma isigivoq, illoqarfiit pingaarnersaannimi suli eqqakkanik immikkoortiterinermi periuseq suli aaqqissugaanngilaq, soorlu kujataa’tungaani atorneqartutut.

Septembarimi puiaasanut igalaaminernullu atoqqitassanut ilioraavissanik containerinik pissarsisoqassasoq Kommunalbestyrelsimi aalajangerneqarpoq, aamma tamakkua Paamiunisut inissiaqarfiit eqqaannut iliorarneqarnissaat pilersaarutaavoq, kommuni ilisimatisivoq.

Atuaruk: Sermersuumi eqqaaveqarnerulissaaq