Oqartussaaffik erseqqissaavoq: Brugsenip saavani taamaammat inuussutissanik tuniniaasoqaqqusaanngilaq

Kalaalimineerniarfinni kommuni najukkami oqartussaasuusoq, Uumasunut Nakorsaqarnermut Inuussutissalerinermullu Oqartussaqarfiup maluginiaqquaa.

Inuussutissalerinermut oqartussaaffiup Nuummi Brugsenip saavani inuussutissanik tuniniaaneq qaammat ataaseq matuma siorna unitsippaa.

- Taamaalilluni kommuni kalaalimineerniarfiup pilersinnissaanut, eqqiluitsuutinnissaanut aserfallatsaalinissaanullu akisussaaffeqarpoq.

Nunatsinni Uumasunut Nakorsaqarnermut Inuussutissalerinermullu Oqartussaqarfik tusagassiuutinut nalunaarummi taama allappoq, tassani sumiiffinni tamanit orninneqarsinnaasuni inuussutissanik tuniniaanermut tunngatillugu pissutsit taassuma erseqqissarusuppaa.

Aamma atuaruk: Biili milluaatilik inuussutissallu ataatsimoortinneqarsinnaanngillat

Brugsenip eqqaani tuniniaaneq unitsikkaa

Inuussutissalerinermut oqartussaaffiup Nuummi Brugsenip saavani inuussutissanik tuniniaaneq qaammat ataaseq matuma siorna unitsippaa, tassanilu Kommuneqarfik Sermersooq tuniniaasunut Brugsenip saavani tuniniaasarnerup inerteqqutaaneranik maluginiaqqusisimannginnerarlugit.

Kommunimi ingerlatsinermut pisortap, Frank Rasmussenip, isornartorsiuineq akerlilerpaa, Inuussutissalerinermullu oqartussaaffik, tuniniaaffiit piumasaqaatinik naammassinninnissaannik qulakkeerinninnissaamut akisussaasuunerarlugu.

Angerlarsimaffinnut imaluunniit angallammit

- Pisanik nutaanik toqqaannartumik pisisartunut tuniniaanissaq inuussutissarsiutigalugu piniartunut aalisartunullu atuuppoq. Tamanna ilaatigut piniartup pisani pisisartup najugaanukaanneratigut imaluunniit pisisartup pisaq aalisartup angallataanut kalaalimineerniarfimmulluunniit aaneratigut pisinnaavoq, Uumasunut Nakorsaqarnermut Inuussutissalerinermullu Oqartussaqarfik nalunaaruteqarpoq.

Oqartussaaffik suliffeqarfiit inuussutissaleriffiusut pillugit Namminersornerullutik Oqartussat nalunaarutaannut innersuussivoq, tassani atuarneqarsinnaavoq kalaalimineerniarfinni tuniniaanermut tunngatillugu kommuni najukkami oqartussaasuusoq. Taamaalilluni kommuni kalaalimineerniarfiup pilersinnissaanut, eqqiluitsuutinnissaanut aserfallatsaalinissaanullu akisussaaffeqarpoq.

Kalaalimineerniarfiit aaqqissuunneqarnerinut piumasaqaatit

Kalaalimineerniarfiup aaqqissuussaaneranut atortorissaarutaanullu tunngatillugu paragraffimi tulliuttut piumasaqaatigineqarput:

  • Inuussutissanut ilitsivigineqartartut qaavi asakkuminartuunissaat qulakkeerniarlugu pitsaasuussapput kiisalu quppaqarnatillu qulloorneqassanngillat. Taamatuttaarlu atortut taakkua toqunartortaqassanngillat.
  • Imermik imerneqarsinnaasumik naammattumik pilersorneqassaaq.
  • Assannut asaffiusinnaasunik atortorissaarusersuisoqassaaq.
  • Eqqagassat eqqiluisaarnissamut akornutaanngitsumik katersorneqarsinnaassallutillu piiarneqarsinnaassapput.
  • Inuussutissat mingutsinneqarsinnaajunnaarlugit inissinneqartassapput. Inuussutissat aamma nunap qaanit pukkinnerpaamik 80 cm-tut portutigisumut inissinneqartassapput

Inuussutissalerinermut oqartussaaffiup maluginiaqquaa, inuussutissaleriffiusutut akuersissummik tunineqaqqaarani aaqqissuussani assigiinngitsuni tuniniaavilerluni tuniniaaneq inerteqqutaanngitsoq. Food Festivali ukiuni kingullerni marlussunni ukiakkut Nuummi ingerlanneqartarsimasoq assersuutigineqarsinnaavoq.

Piumasaqaatilli marluk naammassineqartariaqarput:

  • Ukiumut aaqqissuussani qulinit ikinnerusunik tuniniaasimagaanni.
  • Tuniniaanerit tamarmik sivisussusaat ullut 30-t sinnersimanngippagit

Tuniniaaviit kalaalimineerniarfiup aaqqissungaaneratigut atortorissaarutaatigullu assigissavaat

Powered by Labrador CMS