Inatsisartut
Oqarasuaateqarnerup namminersortunngorsarniarneqarnera nalorninartoq
IA, Siumut aamma Partii Naleraq akerliupput, Atassut, Demokraatit aamma attaviitsoq aalajangersimasunik atugassaqartitsillutik namminersortunngorsaanissamik tapersersuipput
Demokraatineersup Justus Hansenip innersuussutigaa, telefonit aamma oqarasuaatit angallattakkat namminersortunngorsarneqarnissaannik apeqqutip isummerfigineqarnissaa ukiamut kinguartinneqassasoq.
Taassuma ukiakkut ataatsimiinnermut atatillugu politikerit oqarasuaateqarnermillu ingerlatsisut nalunaarusiaq nutaaq, isummerfigineqarusunngitsoq aallaavigalugu ataatsimeersuartinneqarnissaat kissaatigaa.
Atuaruk: Nalunaarusiaq: Tele aggulunneqarli politikkikkullu akuliusimaffigiunnaarneqarli
Nammaqatigiinnissaamik aaqqissuussineq
Taanna Nunatsinni oqarasuaateqarnikkut namminersortunngorsaanerup inuiaqatigiinni aningaasarsiornikkut kingunerisassaannik misissueqqissaarneruvoq Copenhagen Economicsimit suliarineqartoq, Naalakkersuisunillu suliakkiissutigineqartoq.
Nalunaarusiaq taanna isummerfigeqqaarnagu, Inatsisartuni amerlanerussuteqartut inassutigaat nalunaarasuartaateqarnermi nammaqatigiinnissamik aaqqissuussineq maanna atuuttoq attatiinnarneqassasoq, taamaalillunimi Nuummi imaluunniit Siorapalummi najugaqarneq apeqqutaatinnagu assigiimmik akiliisoqartassammat.
Nalunaarusiaq utaqqigaa
Namminersortunngorsaanissamik oqallinnissaq Inatsisartuni Kalistat Lundip, IA, siunnersuuteqarneratigut Telepostimi iliuusissanik Naalakkersuisut suliaqarnissaat pineqarpoq, tamatumani oqarasuaateqarnikkut namminersortunngorsaanissaq erseqqissumik ilaatinneqassalluni.
Oqaluuserisassaq maajip arfernanni siullermeerlugu oqallisigineqarpoq, ullumikkullu maajip 27-anni aappassaanneerneqarnissaa pilersaarutaalluni.
Matuma soqutiginartortaraa, nalunaarusiami innersuussutigineqartut Naalakkersuisut namminneerlutik inniminnigaanniittut eqqaanngilluinnarlugit oqaluuserisassaq oqallisigineqarmat.
Oqaluuserisassap siullermeerlugu maajip arfernanni oqallisigineqarnerani, nalunaarusiaq pineqartoq utaqqimaarneqartoq, Naalakkersuisut siulittaasuata Kim Kielsenip innersuussutigaa.
Atuaruk: Demokraatit Telep kisermaassinera atorunnaarsikkusuppaa
Allaaserisaq tamaat uani sapaatip-akunnerani Sermitsiami saqqummertumi atuaruk, taanna ullummikkut pisiniarfinniilerpoq. Aviisi aamma uani pisiarisinnaavat: