qinersineq
Oqaluttuarisaanermut ilannguttoq: Qinigaasarsimasut nukarlersaat
21-nik ukiulik Ineqi Kielsen, Siumut, nunami inatsisartunut qinigaasarsimasuni nukarlersaavoq
- Kalaallit Nunaanni sanasutut ilinniagaqarneq kalaallisut ingerlanneqarsinnaasoq sulissutiginiarpara.
Ineqi Kielsenip suliassamisut siullertut tamanna sulissutiginiarpaa. Tamanna Sermitsiaq.AG-mut oqaluttuaraa.
21-nik ukiulik Ineqi Kielsen tallimanngormat Inatsisartunut qinigaasartuni nukarlersaalluni qinigaavoq.
Siumumi politikeri Narsami inunngorsimavoq meeraanermilu inuusuttuunermilu annersaa Nuummi najugaqarsimalluni. 2012-imi Nuummi GU-mit naammassivoq, Kujataanilu illoqarfimmut inunngorfimminut nuulluni.
Ilinniagaqarneq pingaaruteqarpoq
Taassuma pilersaarutigaa inuussutissarsiornermi inatsisilerituutut ilinniaqqinnissani,, Handelsakademiet-imullu qinnuteqarsimagaluarpoq. Taassumali allarpassuillu qinnuteqaataat upernaaq kukkusumik suliarineqarsimapput, Ineqi Kielsen oqaluttuarpoq.
– Ilinniagaqarnissaq pingaaruteqarpoq. Kalaallisut oqaasillit 17 aamma 24 akornanni ukiullit amerlaqisut suliffissaaleqipput. Ingerlaqqinnissaminnut periarfissaqartariaqarput. Tamakkua ilinniagaqarnissamut periarfissinneqarnissaat pimoorullugu sulissutiginiarpara, Ineqi Kielsen oqarpoq.
Kim Kielsen ilaqutaraa
ineqi Kielsen Siumup inuusuttunut immikkoortoqarfiani suleqataasimavoq, Siumullu siulersuisuunerani inuusuttunut immikkoortoqarfik sinnerlugu ilaasortaalluni. Politikerip inuusuttup misissorniarpaa kalaallisut oqaasilinnut ilinniagaqarnissamut periarfissat.
– Sanasutut ilinniagaqarsinnaanissamut, immaqalu ilinniagaqarfinni allani, qallunaatut piginnaasaqannginneq aporfiusariaqanngilaq, Ineqi Kielsen oqarpoq, taassumalu Siumup siulittaasua Kim Kielsen ilaqutaraa.
– Ataataga Kim Kielsenillu angutaa illuusariipput. Taamaattumik aap, ilaqutariippugut - qaninngikkaluamik, Siumumi politikeri inuusuttoq Inatsisartunut qinigaaqqammersoq Ineqi Kielsen oqaluttuarpoq.