Opråb
Oqaluinnarani iliuuseqartoqarluni
Naammaleqaaq, Qaasuitsup Kommunia oqarpoq, sammisaqarfinnilu arlalinni siumut sammisumik iliuuseqarnialerpoq. Ilaatigut aalisranermi. Kommuni isumasioqatigiinnissamut qaaqqusivoq
Qaasuitsup Kommuniani aalajangiisartut atorfillillu isumasioqatigiissapput taaneqartumik ´Nunaqarfiga, siunissara - Upernavik nunaqarfiilu´, tamannalu pissaaq 2014-imi upernaakkut.
Tamaasiortoqarniarpoq oqaluinnarneq qatsunneqarmat.
Tusagassiorfinnut nalunaarutikkut Upernavimmi qaleralinniarneq, tunisassiorneq suliffissaaleqinerlu tikkuarneqarput:
– Maanna qanoq iliuuseqartoqartariaqalerpoq. Ajornartorsiutit oqaluuseriinnarnerat naammakkunnaarpoq. Upernavimmi nunaqarfiinilu pissutsit iliuuseqarfigineqartariaqarput. Ajornartorsiutit, aalisartut, sulisartut innuttaasullu naammagiunnaagaat maanna aaqqinniartariaqalerput, kommunaldirektør Lars Lennert-Sandgreen tusagassiorfinnut nalunaarutikkut allappoq, taassuminngattaaq atsiueqataapput borgmester Ole Dorph, Siumut aamma Jens Kristian Therkildsen, aalisarnermut ataatsimiititaliami siulittaasoq.
– Aalisartut oqarsimapput nikeriaqqissinnaanatik. Nutaamik eqqarsartoqartariaqarpoq. Maanna Nuummiit Upernaviliartoqartarunnaassaaq qaleralinniarnermi pissutsinik aalisartunut saqqummiussiartorluni - imarisai ataqatigiinneq ajormata, aalisartullu tusarnaartuuinnartarlutik, tusagassiorfinnut nalunaarummi allassimavoq.
Assersuutitut ilaatigut taaneqarpoq KNAPK aamma Upernavik Seafood februaarip 26-anni Upernaviliarnissaminnik pilersaaruteqartut.
– Pingaaruteqarpoq aalisartut atugaasa ineriartortinnissaat, assersuutigalugu tunisassiorneq ineriartortillugu. Tamanna kinguneqassaaq aalisakkanik avammut tuniniaanerup nunamut aningaasarsiutaanerulerneranik, tusagassiorfinnut nalunaarummi allassimavoq.
Taamaattumik Qaasuitsup Kommuniata pilersaarutigaa upernaaru isumasioqatigiissitsinissaq aalisartunit, sulisartunit Upernaviullu nunaqarfiini oqartussaasunit peqataaffigineqartumik. Naalakkersuisut, naalakkersuisoqarfiit, politikerit aamma Qaasuitsup Kommuniani allaffimmi sulisut, minnerunngitsumillu ingerlatsiviit pisortaat kattuffiillu siulittaasui qaaqquneqassapput.
Gruppip immikkut maluginiaqquvaa KNR, Kalaallit Nunaata Radioa, immikkut qaaqquneqassasoq:
– Tamatumunnga pissutaavoq Upernavik qaqutiguinnaq KNR-imit tikeraarneqartarmat. Inuiaqatigiinnut pingaaruteqarpoq KNR-p pissutsit qanimut malinnaaviginissai, kommunaldirektør Lars Lennert-Sandgreen allappoq, oqaatigaalu isumasioqatigiinnissaq piareersarneqaleruttortoq.