oqaluffeqarneq

Oqaluffinnut inatsissaq marluinnarnik provsteqartitsiniartoq

Provstit pingasuujunnaarsillugit marluinnanngortillugit. Inatsissatut siunnersummi, tusarniaatigineqartumi, tamanna pingaarnersaavoq, provstitulli atorfiup ataatsip atorunnaarsinneqarnissaaanut Naalakkersuisut pisinnaatitaaffigilissavaat.

Ullumikkut inatsit atuuttut malillugu biskoppi provstinik pingasunik ikiorneqartussaatitaavoq. Provsteqarfiit Avannaani, Kujataani Qeqqani Tunumilu atuupput. Kingullertut taaneqartoq domprovstitut aamma atorfeqartinneqarpoq, taamaasilluni biskoppimut paarlattaasarluni.

Maleruaqqusat eqaannerusut

- Isumaliutersuutaasimagaluarpoq naammannginnersoq Kalaallit Nunaanni 2-nik provsteqarnissaa, 3-nik pinnani. Maannali nalilerneqarluni tamanna naammanngitsoq. Pissusissamisoortutullu isigineqarpoq eqaannerusumik aqutsinissaq, provstit qassiunissaat eqqarsaatigalugu, tamatumalu kingunerisaanik nunap immikkoortukkaartumik aaqqissuussineqarluni, siunissamilu provstit 3-niit ikinnerunissaat kissaataalissappat imaluunniit allaanerusumik aaqqissuussineq kissaataalissappat aaqqissuussisoqarsinnaalluni, Ilageeqarneq pillugu inatsissatut Ilageeqarneq pillugu Inatsisartut inatsisaata allanngortinneqarnissaanut oqaasertaliunneqarsimasumi allassimavoq, qanittumilu tusarniaassutigineqalerpoq.

Inatsit atuuttoq malillugu kalaallit Danmarkimi palasiat Qeqqata Tunullu provsteqarfiata aaqqissuussaanerata ataaniippoq. Taamatulli aajangersagaqarneq, nunap immikkoortui allaanersumik isikkoqalersillugu marlunnik provsteqarluni ingerlatsinissaq siunnersuutigalugu, inatsimmit atorunnaarsinniarneqarpoq,

Naalakkersuisut piginnaatitaalersinneqartut

Inatsisssatut siunnersuuteqarnikkut Naalakkersuisut periarfissinneqarput provstit marluk naammannersut aalajangiiffiginissaanut.

- Siunissamut sammisumik Naalakkersuisut aalajangertassavaat provstit qassit pisariaqartinneqarneri, nunallu immikkoortuini taakkua qanoq inissisimassanersut, inatsissatut siunnersuummi oqaaseqaatini allassimasoqarpoq. Naalakkersuisulli aamma aalajangersinnaalissavaat kina domprovstiussanersoq, kalaallillu Danmarkimi palasiat kimut aaqqissuussaanikkut atasuussanersoq.

Ulloq 1. juli 2018 atuutilissaaq

Inatsisissatut siunnersuut ukiup tulliani upernaakkut ataatsimiinnemi oqaluuserineqassaaq, akuerineqarunilu, ulloq 1. juli 2018 atuutilissalluni.

Powered by Labrador CMS