Sisimiut

Oqaluffimmut allanngutsaaliukkamut A.P. Møller tunissuteqarpoq

Sisimiut Katersugaasivia Den A. P. Møllerske Støttefondiminit 1,7 millioner koruuninik tunineqarpoq, illoqarfimmi Oqaluffiup Tungujortup iluarsaannissaanut

Oqaluffik Tungujortoq illoqarfitoqqami paarilluakkamiippoq, ullumikkut Sisimiut Katersugaasiviata inissisimaffiani

Oqaluffiup ilua iluarsaanneqassaaq. Suliniullu tamanna katillugit 2,6 millioner koruuninik akeqassasoq katersugaasivik paasissutissiivoq.

Oqaluffiup inerisimasaa 1700-ukkunni illulioriaatsimut utertinneqassaaq.

Illu iluarsaanneareeruni Sisimiut Katersugaasivianut atalerluni saqqummersitsisarfiullunilu kulturikkut aaqqissuussinernik ingerlatsiviusassaaq. Iluarsaanneqarnissaanik pilersaarusiortuuvoq Danmarkimi Center for Bygningsbevaring.

Iikkat aappalaartut tungujortullu

"Aningaasaateqarfimmut qinnuteqannginnitsinni iluarsaannissaanut pilersaarut illoqarfimmi innuttaasunut saqqummiupparput. Pissangassutigisorujussuusimavaralu iikkat sukallu aappalaartumik tungujortumillu qalipaateqarnerat inuit qanoq qisuariarfigissaneraat. Iikkat 1700-ukkunni aappalaartuullutilu tungujortuusimasut aatsaat siorna aasakkut paasivarput. Qujanartumik isumassarsiaq inuit nuannarilluarpaat. Malunnarluinnarpoq illu taanna sisimiormiut eriagigaat, inuillu ajuusaarutigisimavaat illup ukiuni taama amerlatigisuni atorneqarsimannginnera. Illoqarfiummi tulluusimaarutigaa", katersugaasiviup pisortaa Christine Løventoft tusagassiorfinnut nalunaarutikkut erseqqissaavoq.

Nunatsinni pisoqaanerpaat ilaat

Oqaluffik Tungujortoq nunatsinni oqaluffiit pisoqaanerpaat kusanarnerpaallu ilagaat. Tamatuma saniatigut oqaluffik nunami siullersaavoq kalaallit namminneq suliniuteqarnerisigut sananeqartoq, arferullu orsuanik nappartanik 60-inik akeqarsimalluni.

Oqaluffik "katitertariaannartut" Københavnimit umiarsuarmik nassiunneqarpoq, 1775-imilu atoqqaarfissiorneqarluni.

1926-mi oqaluffik allanngortinneqarpoq atuarfinngortinneqarluni kingornalu apersortittussanut sungiusarfinngortinneqarluni.

2003-mi silataa isikkutoqqaminut utertinneqarpoq, illulli iluata iluarsaanneqarnera unittoorpoq, taamaattumik illu ullumikkut kiffiarneqarsimanngilaq, kiassaateqarani iigaalu qalialu putoqarlutik.

Isikkutoqaa attatiinnarlugu

Unammilligassarujussuaq tassaasimavoq iikkat sallilikkat 1700-ukkunneersut attatiinnarnissaat, tamannalu peqatigalugu illu kiffiarlugu kiassaatilerlugulu. Taamaattumik katersugaasiviup 2014-imi Center for Bygningsbevaring attaveqarfigisimavaa.

Oqaluffik illoqarfitoqqami, ullumi Sisimiut Katersugaasiviata inissisimaffianiippoq.

Powered by Labrador CMS