Oqaluffimmi akiliisoqartannginnissaa amerlanerussuteqartut aalajangerpaat
Kikkulluunniit akeqanngitsumik oqaluffimmiissinnaasariaqarput. Oqaluffinni aningaasanik nakkartitsiviit peerneqarsimapput tillinneqartarneri pissutigalugu
Oqaluffimmiinneq akeqartassanngitsoq amerlanerussuteqartut aalajangerpaat, ataatsimiititaliami amerlanerussuteqartut Naalakkersuisunit siunnersuutigineqartoq itigartinneqarluni. Isumaliutissiissummi tamanna atuarneqarsinnaavoq.
- Kalaallit Nunaanni ileqqoraarput oqaluffiup tamanit katersuuffiusarnera - oqaluffik ammasuusoq. Oqaluffipput upperisarsiornikkut tarnikkut inuttullu naapiffiuvoq tamatumalu saniatigut oqaluttuarisaanitsinnut inuiaqatigiittullu pingaartitatsinnut nalunaaqutaalluni. Taamaattumik oqaluffik tamanut ammasuusartaqarpoq, inuiaqatigiissutsitsinnik oqaluttuarisaanitsinnillu paasisaqarumasut maani najuqaraluarpata takornariaagaluarpataluunniit. Naalagiarnerit avataasigut pulaarnerit akilersinneqassappata tamanna siunnersuutikkut matumuuna akerlilerneqassaaq.
Oqaluffinni aningaasanik nakkartitsiviit piiarneqarsimasut naalakkersuisoq Ane Lone Bagger ilisimatitsivoq.
- Tillinniartoqartarnerini aserorterisarnerit annertusarsimapput, taamaattumillu pisariaqartarsimavoq oqaluffinni nakkaatitsiviit peerneqartarnissaat, tillinniartoqarsinnaanera annikinnerulersinniarlugu.