kanngunartut kingorna
Oqaloqatigiinnikkut hash GIFip akiorniarpaa
Angutit arsaannermi GM-qarnerani ikiaroornartulerinermi erngunnermilu pisut timersoqatigiit kattuffiata GIFip akuersaanngivippai
GIFip akuersaarsinnaanngilaa pissartanngorniunnerit nalaanni ikiaroornartumik hashilerinermik, erngunnernik unataannernillu pisoqartarnera. Kattuffiup maanna kaammattuutigaa meeqqat inuusuttullu akornanni pitsaaliuinermi suliat pimoorunneqarnerunissaat.
Ukiut tulleriit marluk angutit arsaallutik pissartanngorniunneranni kanngunartuliortoqarpoq. Siorna arsaattartut arlallit unataapput maannalu arsaattartut marluk ikiaroornartumik hashimik nassaarfigineqarpoq taassumalu saniatigut ernguttut aamma qassiiliutaallutik. Maanna GIFip kaammattuutigaa pitsaaliuinermut nukittorsarnissaa.
- Pikkorissaanerit paasititsiniaanerillu aqqutissaapput ilisimasat qaffassarnissaannut qanoq ililluni meeqqat inuusuttullu akaareqatigiillutik timersoqatigiissinnaanerannut, GIFip siulittaasua Nuka Kleemann nalunaarpoq.
Taanna isumaqarpoq meeqqat inuusuttullu aallartiffiginissaat pingaaruteqarluinnartuusoq.
- Tamavitta ilisarisimasaqarput ataatsimik arlalinnilluunniit timersornerup silarsuaaniittunik, taamaammat nukittorsartariaqarparput ernitta panittaluunniit timersorsinnaanissaa ileqqut nuanniitsut atunngikkaluarlugit, Nuka Kleemann oqarpoq.
Taamaammat taanna isumaqarpoq timersornerup silarsuani akisussaassilimmik iliornikkut aqqummik pitsaasumik meeqqat inuusuttullu atuinissaat aqqutissiuuttariaqarlugu.