OQAATSIT PILLUGIT SULIAQARNEQ
Oqaasileriffik: Oqaatsit atorneri piginnaanertusarpavut
Oqaatsit ineriartuinnarneri pillugit Oqaasileriffimmi ulapaartoqarpoq
Suliffipassuit suliffeqarfippassuillu kalaasisut attaveqarneq pitsanngorsarniarlugu suliaqarput soorlu aamma namminneq taaguusersuutitik suliaminnut tunngasut assigiinngitsut immikkuullarissut suliarisaraat.
- Suliffippassuarnit oqaatsit pillugit assigiinngitsunik ajornartorsiutit pillugit ikioqqusunik pikkorissaanermillu kissaatilinnik saaffigineqartarpugut, Oqaasileriffiup 2015-li Pisortaasoq Katti Frederiksen oqaluttuarpoq.
Katti Frederiksen Oqaatsit pillugit ilisimatuujuvoq, Ilisimatusarfimmilu 2011-mi Litteratur og Medier ilinniagaralugit kiisalu aamma Alaskami University of Fairbanks atuartuunikuulluni.
Ilinniakkami saniatigut Danskit Oqaasiliortut Allattoqarfiani paarlaasseqartigiinnikkut ilinniarneq ingerlappaa tassanilu Nunat Avannarliit Oqaasiliortut suleriaasaat ilungersuussaallu sammisimallugit.
Piumasaqaatit sakkortusiartortut
Sualummik massuma nalaani politikkikkut namminiilivinnissap ingerlarngata tungaanut atatillugu kalaallisut oqaatsivut pingaartinneqarnissaat pillugit ukkanneqarnerata nalaani, aammalu inuiaqatigiinnnit kalaallisut oqaatsit atorlugit kiffartuusseqqusineq piumasaqaataagaluttuinnarneranit oqaatsinut pikkorinnerulernissap kissaatigineqarnera sakkortusiartuaarpoq.
- Inuppassuit ikioqqusarput piumasarisarlugulu kissaatigisarpaat uagut suliassaringipput eqqortumik kalaallisut oqaatsit atorneqarnissaat pillugit ikiuunnissarput. Kisianni piffissarput aningaasaqarnerpullu killeqarput, Katti Frederiksen oqarpoq, taassuma suliassanik amerlanernit suliaqarnissi tunuarsimaarfiginngilluinnarpaa soorlu innuttaasunit pisortaniillu kissaatigineqartoq, sulisoqarnikkut aningaasaqarnikkullu suliassat malitseqarsinnaappata.
Oqaasileriffik aalajangersimasunik arfinilinnik sulisoqarpoq suliniutinut immikkut sulisoqarluni ilinniartunillu ikiorteqarluni.