EU puisillu amii

Oqaasertaata allanngortinnqarnera Naalakkersuisup nuannaarutigaa

Karl-Kristian Kruse-p qularutiginngilaa EU-p puisinut peqqussutaata allanngortinneqarnera ilorraap tungaanut alloriarnerusoq

Naalakkersuisunut ilaasortaq Siumumeersoq Karl-Kristian Kruse

– EU-mi pisup ineriartornera naammagisimaarpara.

Taamatut oqarpoq politikeri Siumumeersoq, EU-parlamentimi EU-p iluani niuernermut atuisartullu illersorneqarnissaannik ataatsimiititaliami (IMCO) taasineq innersuussutigalugu.

Kalaallit Nunaat taperserneqarpoq

Puisinik tunisassianik eqqusseqqusinnginnermik EU-p peqqussutaata, tamatumani ilaalluni inuit immikkut pineqarnissaat, tamatumuuna Kalaallit Nunaat puisit amiinik tuniniaavimmi annikitsumi tuniniaanissamut kisermaassisinnaatitaalluni, allanngortinneqarnissaanik siunnersuut ataatsimiititaliap sisamanngormat oqaluuseraa.

– Taasinermi ersarissivoq kalaallit immikkut pineqarnissaat tapersersorneqarluartoq, taamaattumillu Kalaallit Nunaata puisinik tunisassianik nunanut EU-mut ilaasortaasunut tuniniaasarnini ingerlatiinnarsinnaavaa, Kruse oqarpoq.

Allannguutissatut siunnersuutit allat arlallit, Danmarkip Kalaallillu Nunaata sulissutigisimasaat, atatsimiititaliap aamma akuersissutigai, ilaatigut puisinit tunisassiat pillugit tamanut paasisitsiniaasarnissaq, aammalu aaqqissuussinerup sunniutaata inuiaqatigiinnut Inunnut sunniutaasa ataavartumik nalilersorneqartarnissaat.

Svenskit, finskit letlandimiullu immikkut pineqarnissaat itigartipaat

Naalakkersuisunut ilaasortap allannguineq nuannaarutigigaluaraa puisinut peqqussummi marloqiusamik paasineqarsinnaasumik allannguisoqarpoq, Kalaallit Nunaannuinnaq iluaqutaanngitsumik. Sverigemi, Finlandimi Letlandimilu puisinninarnermik killilersuisumik imarmiunik ingerlatsinermi immikkut atugassaqartitsisoqarnissaq tapersersorneqanngilaq. Aamma politikerup Siumumeersup paasisinnaanngilaa EU-mi puisit atorneqarsinnaanerat taama paasineqarsimatiginngimmat, puisut sumiiffippassuarni aalisartut aalisagaannik unammillertuummata.

Suliassaq EU-mi ingerlateqqinneqassaaq aasap ingerlanerani, immaqalu ukiaq ilanngullugu.

Powered by Labrador CMS