folketingip ammarnera
Oqaaseqartartoq: Lars Løkkep naalakkersuisui sivisuumik atasinnaapput
Lars Løkke ammaanersiorluni oqalugiarnermini tupaallannartuuteqarpianngilaq, atasinnaassuseqarporli, politikkikkut oqaaseqartartoq isumaqarpoq.
Ullumi Folketingi ammarpoq, ministeriunerlu Lars Løkke Rasmussen (V) aappassaanik naalakkersuisunut siuttuulluni ministeriunertut ammaanersiorluni oqalugiarnermini imatorsuaq tupaallannartunik saqqummiussinavianngilaq.
Taamatut naliliivoq Børsenimi politikkikkut oqaaseqartartoq Helle Ib.
– Ilimaginngilara tupaallannartorpassuarnik saqqummiussissasoq. Qinersinerup unnukkuasulli ministeriuninngornermisullu erseqqissassavaa naalakkersuisut amerlanerussuteqaqqalaaginnartut. Tamanna nalunngilaa, amerlanerussuteqarluartunillu takorusuppoq, Helle Ib oqarpoq.
Tapersersortiminik attassillaqqissoq
Løkkep naalakkersuisui amerlanerussuteqaqqalaaginnaraluarlutik ukiunik pingasunik sivisunerusumik atasinnaapput, taanna naliliivoq.
– Løkkep kakkaffigilluinnagaanik taasaqassagutta tassaavoq aaqqiissutissanik isumassarsiullaqqissusia. Aqqutissaasinnaasunik naaperiarfiusinnaasunillu takunnissinnaalluni. Ippassaq Børsenip topskat pillugu oqaluttuaa qiviaannarsiuk, tassani piareersaalerluni topskat 5 procentimik appasinnerusoq pineqanngitsoq.
– Talerperliit taassuminnga uppititsinissaannut pissutaasinnaasunik takusinnaanngilanga. Qinigaaffiup affaata ingerlareernerani maanaannaq qinersisoqassappat tamanna takussutissaanerussaaq partiit allat, assersuutigalugu DF, ima sanngiillisimatigisut Løkkep pissarsiassani eqqarsaatigissallugu, Helle Ib oqarpoq.
Aningaasanut inatsit liberaliussaaq
Helle Ibip aningaasanut inatsit talerperliit sanaavat tikkuarpaa, tassuuna Løkkep naalakkersuinikkut Dansk Folkepartimik, Liberal Alliancemik De Konservativenillu tunngaveqarneranik takutitsisussaq. Aningaasanut inatsisissaq ulorianartorsiulissaaq, kingulleq taaneqartup kingulliup nunanut siuarsagassanut tapiissutit 2 milliarder koruunit sinnerlugit sipaarfiginianngippagit, taanna tikkuaavoq.
– Partiit amerlasuut tapersuinissaminnut soqutigisaqarput. Aningaasanut inatsisip saniatigut upernaaru dagpenget akileraarutillu aaqqissuuteqqinnissaat sammineqassapput, tamatumanilu Socialdemokraterne peqataanissaminnut aamma soqutigisaqassagunarput. Pingaartumik topskattimut procenti attorneqassanngippat, Helle Ib oqarpoq.