Oqaaseqaat: Partii Inuit ajornartorsiorpoq

Oqaaseqaat allaaserineqarpoq Søren Duran Duus-imit Sermitsiaq.AG-mi nettimi aaqqissuisoq:
Partii Inuit sukkasuumik ingerlasimavoq, Sukkasoorujussuarmik. Sukkavallaarujussuarmik.
Partii januaarimi pilersinneqaramili sukkasuumik ingerlasimavoq, marsillu 12-ianni Inatsisartunut qinersinermi ilisimaneqartutut partii nutaaq Inatsisartunut marlunnik isertitaqarpoq Naalakkersuisunilu marlunnik ilaasortaatitaqalerluni. Partii Inuit pavungarsuaq pisimavoq.
Tamatumali kingorna partii nakkariartupiloorpoq.
Siullermik partiip siulittaasua Nikku Olsen tupaallannartorujussuarmik Naalakkersuisunut ilaasortanngunngilaq. Ullualunnguit qaangiuttut saqqummiunneqarpoq aamma Inatsisartunut ilaasortaasinnaanngitsoq. Nunap inatsisartuini ilaasortaanissaminut naleqqutinngitsutut oqaatigineqarluni. Politikerinit inatsisartuniittunit. Politikerinit illua'tungiliuttunit politikerinillu naalakkersuisooqataasunit.
Politikkikkut oqaaseqaqqusaannginneq - Nikku Olsenillu matoqqanera - pissutigalugit nassuiaatissarpiaa tamanut saqqummiunneqarsimanngilaq, nalunngilarpulli tamanna nakuusernermik pissuteqarpoq, marsimi qinersinermi ukiut tallimat iluanni naammassineqarsimanngitsumik, taamaasillunilu ukiunut tallimanut killissarititakkut Nikku Olsen pisarineqarpoq.
Unitsitsissutaasoq
Nå, taamaattorli oqaatsit sorsuutiginerat, Partii Inuit qineqqusaarutiginerpaasaat, tamakkiisumik nanginneqarsinnaalluarpoq.
Kisianneqarporli.
Tassami Partii Inuit ukiakkut ataatsimiinnermut oqaluuserisassatut siunnersuutaanit 16-init sisamaannaat akuerineqarput. Oqaluuserisassarlu ataasiinnaq kalaallit oqaasiinut tunngavoq.
Unitsitsissutit tamakkua pissutigalugit tupaallannanngitsumik Nikku Olsenip Inatsisartut suleriaasaat, Inatsisartuni suliermi tunngaviusoq, sakkortuumik saassuppai.
Tamannali Demokraatit siulittaasuannut Jens B. Frederiksenimut ingasappallaalerpoq.
– Nikku Olsenip suleriaatsimik saassussinera ajoraluartumik Partii Inuit-mut ilisarnaataavoq, tassa suut tamaasa atorlugit eqqorneqartutut naakkinartutut imminut isigitinniartarmat. Partii Inuilli eqqorneqanngillat nallinnartut. Partiiuinnarpoq arlaat pissutigalugu suliassaminik naammaginartumik naammassinnissinnaanngitsoq, Jens B. Frederiksen oqarpoq.
Inatsisartut siulittaasuata Lars-Emil Johansenip, Siumumeersup, Nikku Olsenip isorinninnera eqqissivilluni tiguvaa, kajumissaarlugulu uparuagassaqaruni Inatsisartut siulittaasoqarfiat attaveqarfigeqqullugu.
Inatsisartut suleriaasiata allanngortinneqaratarsinnaaneranik siulittaasoqarfik Partii Inunnit saaffigineqaranilu siunnersuumik tigusaqarsimanngilaq. Taamaattumik siulittaasoqarfik - Lars-Emil Johansen naapertorlugu - aamma Inatsisartut suleriaasiata allanngortinnissaanut, Partii Inuit siulittaasuata piumasaqaanut, isummersimanngilaq.
Maani Sermitsiaq.AG-mi aamma tupigusuutigaarput Partii Inuit siunnersuutai 12-it itigartinneqarsimammata. Partii - Jens B. Frederiksenip aamma tikkuaaneratut - periarfissaqarpassuaqarlunilu piffissarissaarsimavoq siunnersuumminik iluamik suliarinninnissaminut, tamannali Partii Inuit sapersimagunarpaat.
Ajornartorsiortoq
Nikku Olsenip peqataasalu kinguariarnerat kingulleq pingasunngormat unnukkut pivoq: Lars Mathæussen, manna tikillugu Inatsisartunut ilaasortaasoq partiimi sinniisussatut siullertut inissisimanini pissutigalugu, Siumumut nuuppoq.
Inatsisartuni Randi Olsen kisiartaalerpoq. Pissutsilli nutaat iluaqutaasinnaapput Partii Inuit ukiakkut ataatsimiinnermut oqaluuserisassatut siunnersuutit sisamaannaat akueritissimammagit.
Pissangalluta utaqqivarput Partii Inuit tullianik sumut aallariartissaneraatigut. Tassami Partii Inuit ajornartorsiorpoq, partiip qanittukkut qinersisartuminut takutinngippagu atanissaminut tunngavissaqartoq.