Nuuk
Ooqattaarinissamut AWG 2016 ikiortissarsiorpoq
Arctic Wnter Gamesimik aaqqissuussisut ingerlatassarsuup ammarnersiorneqarnissaanut ooqattaarinissamut inuppassuarnik atorfissaqartitsipput
Arctic Winter Gamesip, Nuummi ingerlanneqartussap, ammarneqarnissaanut sapaatiuppat ukioq affaannanngussaaq.
Aaqqissuussisullu ikiortissanik atorfissaqartitsipput.
Taamatut Arctic Winter Games tusagassiorfinnut nalunaarutikkut allappoq.
Misigisassaq nalissaqanngitsoq nuannersorlu
– Aappaagu marsimi AWG 2016-ip ammarnersiorneqarnera annertoorujussuullunilu immikkut illuinnartumik takutitsiffiussaaq. Sapaatiuppat periarfissatuaraarput ammaanersiornissap ooqattaarnissaanut, tamannalu sapinngisamik piviusorpalaartinniassavarput. Tamatumunnga inuit 600-t atorfissaqartippavut tamatuminnga ikiuukkusuttut, nalissaqanngitsumik nuannersumillu misigisaqarusuttut, General Manager Maliina Abelsen tusagassiorfinnut nalunaarummi oqarpoq.
Ooqattaarineq imatut ingerlassaaq
Ooqattaarineq sapaatiuppat Nuuk Playgroundimi nalunaaqutaq 16.30 aallartissaaq nalunaaqutarlu 18.30 Inussivimmi naammassineqassalluni.
Inussivimmi nipilersornermik aliikkusersuissapput Inngertartut, tivasartoq Jens Nielsen torlussortartorlu Hans Henrik. AWG 2016-ip erinarsuut ilisarnaataa "We are the Arctic", Small Time Giants-ikkunnit sananeqarsimasoq, ilisaritinneqassaaq, ingerlaaqatigiinnermilu erinarsuutip videoliarineqarnissaanut immiussisoqassaaq.
Peqataasut akissarsiassanik eqquisinnaapput
Aaqqissuussisut naapertorlugit ingerlaaqatigiinnermi peqataasut tamarmik akissarsiassanik pilerinartunik eqquisinnaapput, tassaasunik iPhone 6, iPad mini imaluunniit BOSE høretelefonit.
Piareersarnerit allattoqarfimmit piumassutsimillu sulisunit ingerlanneqaleruttorput. Aaqqissuussassarsuup nittarsaanneqarneranut atatillugu videoliortoqarsimavoq qiimasunik kajumissaarutaasunillu, taakkuninngalu sanasimapput AWG 20016-ip ambassadøria Kimmernaq Kjeldsen nipilersoqatigiillu Small Time Giants. Taakkua YouTube-mi, Facebookimi Katuallu filmertarfiani takuneqarsinnaapput.