Ataatsimiinneq

Ombudsmandip paaqqinnittarfiit namminersortut misissortalissavai

Inatsisartut ombudsmandiata siunissami meeqqanut paaqqinnittarfiit/suliffeqarfiit namminersortut nakkutigisinnaalissavai, tamanna inatsissatut siunnersuummi atuarneqarsinnaavoq. Maannamut pisortat paaqqinnittarfiutaat kisiisa ombudsmandip nakkutigisinnaasimavai

Meeqqanut paaqqinnittarfiit namminersortut siunissami Inatsisartut ombudsmandianit misissorneqartalissapput. Inatsisartut siulittaasoqarfianit siunnersuutigineqartoq akuerineqassappat.

Namminersorlutik Oqartussat aamma kommunit ingerlataasa nakkutiginissaat, ombudsmandip suliassaraa. Pisortat paaqqinnittarfii misissorneqartussaatitaanerannik tamanna aamma isumaqarpoq.

- Paaqqinniffiilli/suliffeqarfiilli namminersortut meeqqat eqqarsaatigalugit suliassanik isumagisaqartut Ombudsmandip massakkut taamaallaat killilimmik toqqaannartumik nakkutigisinnaavai, Inatsisartut siulittaasoqarfiat inatsimmut nutaamut saqqummiussissummi allappoq.

Inatsisip tamanna allanngortissavaa. Ombudmandi siunissami meeqqanut paaqqinnittarfinni namminersortunut aamma nakkutilliisalissaaq.

Toqqaannanngitsumik nakkutilliineq
Ombudsmandip maanna nakkutiginninnerit toqqaannanngitsut ingerlassinnaavai, taassuma pisortat oqartuussaaffii ulloq unnuarlu paaqqinnittarfinnik nakkutiginnittuusut nakkutigisussaagamigit.

- Ombudsmandeqarnermik aaqqissuussineq sunniuteqarluassappat Ombudsmandip pineqartunik taakkuninnga qitiusumik suliassaqarfinni toqqaannartumik nakutilliisinnaanera piumasaqaataasussaavoq, inatsisissatut siunnersuummut oqaaseqaatini tamanna allaqqavoq.

Tamatuma saniatigut ombudsmandip paaqqinnittarfiit namminersortut nammineersinnaajunnaarsitsinermut tunngasunik nakkutilliisinnaanngortinneqassaaq.

Naalakkersuisut siunnersuut tapersersorlugu nalunaaruteqarput.

Siunnersuut ullumikkut siullermeerneqassaaq.

Powered by Labrador CMS