meeqqamik arsaarinninneq

Ombudsmandi meeqqat inissinneqarsimasut pillugit sulianik misissugaqarpoq

Suliani angajoqqaat akuersitinnagit meeqqat arsaarinnissutaagaangata, kommunit suliami inatsisit malinneraat Vera Leth misissuisarpoq

Vera Lethip kommunit inatsisit malissagaat erseqqissarpaa

Inatsisartut Ombudsmandiat, Vera Leth, meeqqat angerlarsimaffiup avataanut inissinneqartillugit kommunit inatsisit malinneraat, misissorneqarnissaanut suliniuteqarpoq.

Atuaruk: Nuummi meeqqat angerlarsimaffiat nutaaq

- Misissuinera sulianut inissiinerit akuersissuteqartoqarneratigut pisimagaluartut akuersinerup kingusinnerusukkut tunuartinneqarfigisimasaanut immikkut sammititaavoq. Suliani taamaattuni malittarisassat sakkortusisat tunngavigalugit aalajangiisoqarpat kommunip inissiineq aatsaat aalajangiusimasinnaavaa, Vera Leth tusagassiorfinnut nalunaarummini ilisimatitsivoq.

Pinngitsaaliissummik inissiineq
Taassuma tikkuartorpaa, akuersissuteqartoqarsimanngippat taamalu ulluinnarni oqartarnertut pinngitsaaliissummik inissiineq pinngitsaaliissumilluunniit peersitsineq pineqarpat piumasaqaatit sakkortusisat atuuttut.

- Inatsiseqartitsineq naapertorlugu angajoqqaatut oqartussaassutsimik tigummiaqartup – meeqqallu 15-ileereersimaguni nammineq - inissiisoqarnissaanik akuersissutiginnissimanissaat pingaarutilerujussuusoq, Vera Leth uparuaavoq.

Inatsisinut Ataatsimiititaliaq
Ombudsmandip atorfeqarfinni suliat ingerlasut pingaaruteqarnerusutut tunngaviunerusumillu inissisimasut ilaat arlallit Inatsisartut Inatsisinut Ataatsimiititaliaannut nalunaarutigereerpai.

- Kommunit akuersissuteqartoqanngitsoq inissiinertut ittuni meeqqamut namminermut meeqqallu angajoqqaavinut taama sakkortutigisumik akuliunnikkut iliuuseqaraangamik malittarisassanik malinnittarnersut iliuuseqarnermullu tunngaviusoq eqqortuusarnersoq misissorniarpara, Vera Leth erseqqissaavoq.

Atuaruk: Meeqqanut inuusuttunullu pineqaatissiisarnerit pillugit S paasisaqarusuttoq

Powered by Labrador CMS