Olsvig: Nunanut allanut politikki nutaamik aaqqissuunneqassaaq

– Maanna Naalakkersuisuusut nassuertariaqarput akisussaaffillu tigullugu. Iluarsaassisoqassaaq taamaatullu kukkusoqaqqinnginnissaa qulakkeerneqassalluni.

Taamatut qisuariaateqarpoq partiip illua'tungiliuttup siulittaasua Sara Olsvig (IA), Naalakkersuisut ippassaq Thulemi isumaqatigiissutip amerikarmiut selskabiannut annaaneqartup ingerlarnganik eqqartuussissuserisup misissuinerata ilaa tamanut saqqummiuitereeraat.

Taanna isumaqarpow nalunaarusiap imarisai pissutigalugit isumaliutigineqalertariaqartoq naalagaaffiup Kalaallit Nunaannik suleqateqarnera nutaamik aaqqissuunneqartariaqannginnersoq.

Suliassamut peqataanngitsoq

– Kalaallit Nunaat Danmarkilu peqatigiillutik aaqqissuussineq tamaat misissortariaqarpaat, pingaartumik nunanuyt allanut isumannaatsuunermullu politikkimut tunngasoq. Nalunaarusiap takutippaa taakkunani marlunni iluarsisassaqartoq misissugassaqartorlu.

Taanna isumaqarpoq Ole Spiermannip eqqartuussissuserisutut nalunaarusiaa inerniliisoq isumaqatigiissutip kalaallinit qallunaanillu tigummiinnarneqarnissaanik politikkikkut suliniuteqarnermi taamanikkut Naalakkersuisut siulittaasuat Aleqa Hammond (S) piaaraluni peqataaniarsimanngitsoq.

Hammondip imaluunniit nunanut allanut ministerip Kristian Jensenip (V) ullumikkut pisimasoq isummerfigiumanngilaat.

Kalaallit Nunaanni naatsorsuutigiuaannarsinnaanngilarput soqutigisavut tamatigut Danmarkip illersortassagai, Sara Olsvig oqarpoq.

– Suliassami matumani Danmarkip EU-p inatsisai namminerlu inissisimanini malinniarsimavai, Kalaallit Nunaata inissisimanera pinnagu. Tamannarpiaq pissutigalugu pisariaqarluinnarpoq suliassani taamaattuni Kalaallit Nunaata eqeersimaartuunissaa suliamullu pikkorissuunissaa, taamatullu pisoqaqqinnginnissaa, Inuit Ataqatigiit siulittaasuat oqadrpoq.