isumaginnittoqarfik
Olsvig: Kommuni meeqqat inuunerannik kingunerlutsitsisinnaavoq
Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoq Sara Olsvig, Kommune Kujalleq sakkortuumik isornartorsiorpaa, ''meeqqat atugarliortut inuunerannut peqqissusiannullu toqqaannartumik kingunerlussinnaasunik'' peqartoq isumaqarpoq
Tusagassiuutinut nalunaarummi Sara Olsvig allappoq, kommuni apriilimi 2016-imi meeqqat atugarliortut sullinneqarneranni ajornartorsiortoqarnera pissutigalugu ikiorneqarnissamik qinnuteqarluni Isumaginninnermut Naalakkersuisoqarfimmut saaffiginnissimasoq.
Naalakkersuisoqarfiup sulisut pingasut kommunimut ikiuutsikkiartorlugit aamma ajornartorsiutip qanoq angitigineranik paasiniaasussat aallartippai.
- Siunnersuisarfimmeersut tikikkamik ilaatigut paasivaat, meeqqat pillugit Narsami suliat arlaqartut kommunip pissarsiarisinnaasimanngikkai tammarsimammata. Siunnersuisarfiup 2016-imi ukiup affaata ingerlanerani sulisut marluk arfinillillu akornannik amerlassuseqartut Qaqortumi Narsamilu sulisippai. Piffissami suliniuteqarfiusumi isumaginnittoqarfimmi sulisunik amigaateqartoqaannavissimavoq, tamatumalu kingunerisimallugu siunnersuisarfimmeersut suliassat angummatsinniarlugit isumaginnittoqarfiullu suliassanik suliaqarneranik aaqqissuussillutik sulinissaraluarminnut taarsiullugu paarlatsitullusooq sulisariaqartarsimanerat, Sara Olsvig ilisimatitsivoq.
- Annertuutigut amigaateqartoq
- Ilanngullugu oqaatigineqassaaq isumaginninnerup iluani immikkoortortanik nakkutilliisut paasisimammassuk, kommunip meeqqanik inuusuttunillu sullissinerani annertuutigut amigaateqartoqartoq, meeqqat atugarliortut inuunerannut peqqissusiannullu toqqaannartumik kingunerlussinnaasunik. Taamaammat isumaginninnerup iluani immikkoortortanik nakkutilliisut, suliassaqarfiup qanimut malinnaaffigineqarnissaa siunertaralugu januar 2017-imi Kommune Kujallermut immikkut ittumik nakkutilliiartorput, Sara Olsvig allappoq.
Kommune Kujallermi isumaginninnernermut ataatsimiititaliap siulittaasua Karla Egede Bisgaard tusagassiuutitigut nalunaarummi 22. januarimeersumi allappoq, Ole Mølgaard Motzfeldt, IA sinnerlugu kommunalbestyrelsemi ilaasortaq kommunip isumaginnittoqarfiani pissutsit pillugit, Nuuk TV-kkut eqqunngitsunik uppernarsaatissaqanngitsunillu saqqummiussaqartoq.
Olsvig: Nassuerutiginnillusi suleqatigiigitsi
Sara Olsvigip parteeqatini Ole Mølgaard Motzfeldt tamakkiisumik taperserlugu tusagassiuutinut nalunaarummi tallimanngornermi saqqummiunneqartumi allappoq:
- Aallarniutigalugu oqaatigeqqaarusuppara, Kommune Kujallermi meeqqat atugarliortut sullinneqarneranni ajornartorsiuterpassuaqarneranik Ole Mølgaard Motzfeldtip oqaasii tapersersinnaagakkit, isumaqarpungalu ajornartorsiutit taakku kommunimi politikkikkut sulialinnit nassuerutigineqartariaqartut, ilorraallu tungaanut saattoqarnissaa siunertaralugu suleqatigiillutik suliniutinik aallartitsisariaqartut.